La guerra'l perexil llegó a Asturies

Por suerte, la "Guerra'l Perexil" ente España y Marruecos nun acabó con desgracies personales que llamentar, nin tampoco foi una d'eses guerres que tresmite en directo la CNN. Pasáu l'afoguín, ye tiempu pa la chancia. Polo menos, asina traten nel diariu "El Mundo" les líriques declaraciones del ministru Federico Trillo esplicando l'actuación de la tropa española na invasión del peñón. Por supuesto, pela rede tamién circula humor gráficu y chabacanaes delles sobre la engarrada. Anque Asturies ta a bien de kilómetros del "teatru d'operaciones" parez que la tensión llegó hasta equí en forma de suspensión d'una "polémica" esposición. Ello ye que la Obra Social y Cultural de Caxastur decidió suspender la muestra "Fez, ciudá interior" que diba entamar el 8 d'agostu en Xixón. Los responsables del Centru de Cultura de Barcelona (CCCB), que ye d'onde vien la esposición, aseguren que los llamaron dende Asturies pa esplicar que se retrasaba la esposición "alegando'l clima de crisis ente España y Marruecos". La historia sal entera nel periódicu El País.