La gastronomía asturiana protagoniza la xornada nel Festival Máscara Ibérica de Lisboa

Los quesos asturianos, la sidra nes sos variedaes diferentes y el Vinu de Calidá de Cangas, xunto colos productos de la zona de Cangues, son protagonistes esti vienres nel FIMI de Lisboa. No musical, van actuar los mierenses Skanda.

Dende ayeri, cuando principió’l VIII Festival Internacional Máscara Ibérica (FIMI), los collores d’Asturies tan siendo centru d'atención en Lisboa gracies a Los Sidros y La Comedia, que sorprenden a lisboetes y turistes colos sos blincos y simpatía. La mazcarada de Valdesoto tuvo inclusive apaiciones na RTP, la televisión pública portuguesa, que fai un siguimientu importante d’esti eventu. La representación asturiana en Lisboa va aumentar esti vienres, cuando la gastronomía del país va convertise nuna de les protagonistes de la estaya ‘Gastronomia e Vinhos Ibéricos’. El direutor gastronómicu y de Comunicación Corporativa de Crivencar/Tierra Astur, Lluis Nel Estrada, y el xefe de cocina del restaurante Los Arcos (Cangues d’Onís), Ramón Celorio, van presentar a periodistes y críticos gastronómicos una amuesa de productos asturianos.

A les 19 hores, Estrada va entamar una preba de quesos asturianos, caún d’ellos maridaos con sidra natural, sidra brut, sidra de xelu o Vinu de Calidá de Cangas nes sos variedaes tintu y blancu. “Trátase d’una presentación gastronómica pa mostrar la bondá de los nuesos quesos y la nuesa bodega”, señala l’espertu, que lleva a Lisboa delles variedaes de quesu pa que los comensales puedan facese una idea de la nuesa producción. Los quesos d’Asturies son bastante desconocíos fuera de les llendes del país, “inclusive polos propios asturianos”, polo que siempre sorprenden al públicu. “Y la bodega, nin te cuento”, añade Estrada, qu’empondera la meyora de la producción del Vinu de Calidá de Cangas.

Tres la preba de quesos, alredor de les 20 hores, Celorio va entamar la so amuesa de cocina, que va consistir na presentación d’una serie de platos ellaboraos con productos del conceyu de Cangues d’Onís, “carnes, verdures, frutes y quesos”, apunta’l xefe de cocina de Los Arcos. “L’oxetivu ye dar a conocer los productos tan bonos que tenemos y fomentar la zona”, esplica Celorio, que destaca’l bon recibimientu que tienen siempre que participa nesti tipu d’actividaes, inclusive nel otru llau del Atlánticu. Amás, xunto col cocineru va tar presente Germán Bernardo Izquierdo, de Coctelería Cuarenta Grados de Cangues d’Onís, que va ellaborar seis cócteles, ente ellos ún de base de sidra, de nome ‘Sidrafizz’, y otru de xelu inspiráu nos Picos d’Europa, ‘Deshielo’.

Otra manera, mañana al meudía va tener llugar una preba de Quesu Gamonéu y de sidra asturiana, cedíos pol Conceyu de Cangues d’Onís y de Siero, de manera respeutiva. Estos dos conceyos unvían una representación importante a Lisboa, col desplazamientu de dellos ediles y de los alcaldes José Manuel González y Eduardo Martínez Llosa. Tamién va viaxar a la capital portuguesa Carlos Rubiera, conceyal d’Educación, Cultura, Xuventú y Fiestes de Xixón. Estos trés conceyos tán faciendo promoción turística na Praça do Rossio nun stand de los munchos que conformen la Mostra das Regiões.

Actuación musical de Skanda

La estaya ‘Palco Iberico’ del FIMI, una amuesa de la música que se fai en dellos puntos de la Península Ibérica, va inaugurala esta nueche Skanda (21 hores), actuación a la que va siguir la de los gallegos Cuchufellos. Los mierenses presentarán la so fusión folk-rock a una audiencia importante, yá que la plaza del Rossio tórnase nel epicentru festivu de Lisboa mientres los díes que dura’l festival.

Asturies.com va tar presente nestes xornaes en Lisboa pa informar a los sos llectores de toles actividaes con sellu asturianu que tengan llugar nel VII Festival Internacional Máscara Ibérica, cita capaz de movilizar a miles de persones procedentes de tola Península Ibérica y escaparate importante pa la cultura y tradiciones del país. Amás, vamos ufrir una galería de semeyes del VIII Desfile de la Máscara Ibérica, actividá central del FIMI, na que Los Sidros y La Comedia, acompañaos de La Bandina Principado, van representar a Asturies. Ésti va principiar mañana, a les 16.30 hores, y nél participen más de 500 persones pertenecientes a 30 grupos de Portugal, Galicia, Lleón, Zamora, Cáceres, Euskal Herria y Salamanca. Amás, per primer vegada, va caleyar les cais de Lisboa un grupu de fuera de la Península Ibérica, Survakari, de Pernik (Bulgaria).

Semeya fecha por Iván G. Fernández.