La gala d'entrega de los Premios Lliterarios va celebrase en Xixón

Esti miércoles va tener llugar l’actu d’entrega de los Premios Lliterarios 2012. La conseyera d’Educación, Cultura y Deporte, Ana González, va presidir una gala que nesta ocasión va celebrase en Xixón, na Biblioteca Pública Xovellanos.

Los ganadores de los cinco gallardones que componen los Premios Lliterarios del añu pasáu van recibir la so recompensa de manes de González, que va tar acompañada del viceconseyeru de Cultura y Deporte, Alejandro Calvo, y de la direutora xeneral de Política Llingüística, Ana María Fueyo Llaneza. Los premiaos nesta edición son Quique Faes, por ‘La vida increíble’ (XXXIII Premiu Xosefa Xovellanos de novela); José Ángel Gayol, por ‘El llibru de les coses misteriores’ (XVIII Premiu Xuan María Acebal de poesía): Xulio Arbesú, por ‘Los deseos del dineru’ (XVIII Premiu Máximo Fuertes Acevedo d'ensayu); Milio Rodríguez Cueto, por ‘Carne de melandru’ (V Premiu María Xosefa Canellada de lliteratura infantil y xuvenil); y Javier Marinas, por Homes (IV Premiu Alfonso Iglesias de cómic).

L’eventu va principiar a les 19.30 hores na Biblioteca Pública Xovellanos, na cai Xovellanos 23, al llau del Centru de Cultura Antiguu Institutu. La gala del 2011, celebrada’l 20 d’avientu d'esi mesmu añu, tuvo llugar nel Palaciu d’Inclán Leiguarda d’Uviéu y presidióla’l conseyeru de Cultura y Deporte anterior, Emilio Marcos Vallaure.