La gala del Premiu al Meyor Cantar, el 14 de marzu na Llaboral

|

El 30 d’esti mes fina’l plazu pa presentar candidatures pal Premiu al Meyor Cantar 2014, concursu que celebra la so octava edición. El Teatru de la Llaboral va repetir como sede de la gala d'entrega del gallardón, prevista pal 14 de marzu. 

Los intérpretes y grupos que pretendan aspirar al premiu han de presentar una solicitú según el modelu normalizáu qu’apaez nel BOPA –disponible al final de la noticia como documentu axuntu– enantes del día 30 xunto con documentación diversa y un CD que recueya’l cantar n’asturianu o gallego-asturiana que se quiera presentar a concursu. La canción ha de ser una obra de creación orixinal, tanto na lletra como na música, comercializada mientres l’añu 2013. Queden escluyíes les pieces tradicionales yá esistentes, les versiones o adaptaciones d'obres de creación publicaes orixinalmente n'otra llingua, y los cantares que nun fueren editaos y grabaos per primer vez nesos doce meses.

Una vegada fináu’l plazu, un xuráu conformáu por ente cinco y nueve persones contrastaes dientro de la música asturiana va decidir los cinco artistes o grupos que pasen a la final y que van actuar en direuto na gala d’entrega del premiu prevista pal 14 de marzu na Llaboral. El ganador va llevar una escultura orixinal y esclusiva d’un o una artista  asturiana de prestixu reconocíu y va recibir promoción dende’l Gobiernu al traviés de los medios de comunicación y n’eventos entamaos pola Alministración. Nesta ocasión, la convocatoria nun cita la presencia de los autores del cantar ganador nel Liet International. La fundación frisona qu’organiza’l festival européu de la canción en llingües minoritaries nun anunció entovía qué va asoceder col eventu tres l’anulación del 2013 por decisión unilateral de la Cullittività Tarrituriale di Corsica cuando yá taben confirmaos el representante frisón, lapón y asturianu, que diba a ser el grupu Taranus col cantar ‘Ensin ti’, dexando ensin marxe de maniobra a los responsables del Liet. Según señalaron nun comunicáu en xunetu tres comunicar el refugu de l’alministración de la isla mediterránea, la so intención yera la de centrase na edición del 2014 del festival y les siguientes.

Pa promocionar l’idioma y la música asturiana

El Premiu al Meyor Cantar creóse nel añu 2007 cola mira de cola mira de “consolidar, arriquecer y prestixar la llingua y la cultura asturiana”, amás de pa dinamizar l’actividá cultural del país, pa lo que’l Gobiernu fai coincidir la gala d’entrega del gallardón con una fecha averada al Día Internacional de la Llingua Materna, que se celebra’l 21 de feberu. Nes siete ediciones anteriores los ganadores foron Toli Morilla, por ‘Azul y gris’; Herbamora, por ‘Nosh’; Alfredo González, por ‘La nada y tu’; Xera, por ‘Tierra’; Skama la Rede, por ‘Condenáu’; Asturiana Mining Company, por ‘Si nun conoces Vaḷḷouta’; y Taranus, por ‘Ensin ti’.  

 

Contador Estadistiques