La gaita d'Eduardo'l de Sabina vuelve a sonar

Eduardo'l de Sabina, o Eduardo de Ribadesella, ye un d'esos nomes que caltienen la tradición más pura de la gaita asturiana. El Muséu del Pueblu d'Asturies y FonoAstur espublicen agora un discu con una esbilla de los cantares más característicos d'esti músicu.

Eduardo Martínez Ballesteros ñació en Sardéu (Ribeseya) en 1927. Ya bien de neñu albidrábase nél que tenía bona traza pa la música, pero les dificultaes económiques de la familia fexeron que nun pudiere tener una carrera musical col vigulín, que foi l'instrumentu que primero y más llamó l'atención a Eduardo. Pero como suel pasar munches vegaes, la casualidá fexo que cayera nes manes d'Eduardo una gaita, instrumentu que-y sirvió como mediu de tresmisión de les sos inquietues musicales.

Anque deprendió a tocar la gaita d'una manera autodidacta, recibió los conseyos dende bien ceo d'un los nomes más importantes de la gaita asturiana tanto como constructor como instrumentista, el Gaiteru de Margolles José Remis Vega, padre del conocíu José Remis Ovalle. Asina, adulces, y según diba permitiendo-ylo'l so deprendizaxe, Eduardo entamó a tocar pa fiestes y romeríes colo qu'empricipió a garrar nome per tola zona oriental d'Asturies. Dende últimos de la década de los sesenta hasta 1971 podemos llamala la época d'oru del gaiteru, o polo menos la más pública, yá que foi nesos años cuando grabó seis discos como solista. Amás del so llabor como gaiteru solista, l'acompañamientu de la tonada foi de siempres lo que mas-y prestó tocar, lo que quedó bien espeyao nes sos grabaciones acompañando a xente como Jose Noriega, Celestino Rubiera, Manolo Ponteo o Josefina Argüelles.

El discu qu'asoleya agora'l Muséu de Pueblu d'Asturies, y que pertenez a la colección Fontes Sonores de la Música Tradicional Asturiana, ye una amuesa bona de tol repertoriu estilísticu d'Eduardo'l de Sabina. Diecinueve cantares que xunten les pieces más clásiques del repertoriu de gaita, xotes, pasudoble, floréu, con otres pieces que cuando les deprendió Eduardo yeren auténtiques novedaes na música de gaita como una Habanera Cubana, La Panderetera o'l conocíu cantar republicanu l'Himnu de Riego. Amás tamién hain nel discu delles tonaes onde Eduardo aconpaña al cantante Luis Estrada.