La Fundación Caveda y Nava valora la política llingüística d'Areces

La Fundación Caveda y Nava tuvo a últimos del añu acabante de terminar col Presidente asturianu una entrevista que llevaba pidiendo dende diba meses. El presidente de la Fundación, José Luis Atienza, punxo per escrito nuna carta entitulada "no habrá guerra lingüística en Asturias" les conclusiones que sacó d'esta entrevista. Na carta, escrita por J.L. Atienza, presidente de la Fundación, diz que, anque nun quier entrar en mayores detalles, la entrevista confirmó tolo que barruntaba que podía haber de malo. Ello ye que pal presidente de la Fundación nun-y queda dulda nenguna tres de la entrevista de que les opiniones personales d'Areces en tema de llingua y cultura asturianes pesen abondo na política real que depués sigue'l Gobiernu asturianu. Na carta abierta cola qu'Atienza quier responder a Areces diz que la Fundación persabe qu'hai opiniones roceanes con que se faigan midíes de recuperación del idioma, pero esprésa-y qu'estes son menos de les que se cuenta, y pon darréu un casu curiosu pa facer comparanza, desplicando como, neto qu'en cualquier otra intervención pa salvar un edificiu históricu esti ponse primero baxo'l techu de la llei pa dempués restauralu, emplegando pa ello planos, técniques y materiales modernos. Too esto que val pal patrimoniu material -diz la carta d'Atienza- parez que nun quier dase de pasu pa cola recuperación del idioma, que ye ún de los elementos del la cultura astur que más falta tienen d'ello. La carta sigue acusando al Gobiernu d'Asturies d'actuar nestos temes "vergonzosamente" y diz que'l Gobiernu asturianu fai poco por ello, y que nun-y da más que se vea que lo que fai ye a la trágala y como queriendo facer un favor. La polémica pola presencia nel currículu d'Educación Secundaria de la polémica denominación de «lengua tradicional bable/asturiano y literatura» y el consiguiente articuláu del mesmu merez pa la Fundación el calificativu de "auténticu decretu de disolución del asturianu como llingua y consagración del mesmu como dialectu del castellanu". N'acabando esti puntu, la carta saca'l tema de la cooficialidá, na que ve un instrumentu necesariu pal exerciciu de les llibertaes ciudadanes, y non como un fin en si mesma. La carta sorraya tamién que la defensa de la cooficialidá nun tien por qué casar a la fuerza col nacionalismu, lo que-y abulta al autor de la mesma como una asociación malintencionada na qu'amás a la definición política suelen amestáse-y los calificativos d'estremista y violentu. La Fundación diz que ye llabor del Gobiernu que nun se llegue a dar el casu de qu'haya violencia nin estremismu, pero que lo que nun pue facese ye inventar la presencia d'ellos pa quitase del deber de defender l'idioma, que ye lo que nun ta faciendo.