La Fundación Caveda y Nava entama un ciclu de conferencies

La Fundación Caveda y Nava, formada por persones representatives de les más variaes sensibilidaes sociales, entama pa la selmana qu'entra un ciclu de conferencies que va allongase hasta l'añu qu'entra y col que quier llamar l'atención alredor del peligru de desapaición qu'amenaza la sobrevivencia de les llingües minoritaries, ente elles l'asturianu.

Especialistes de prestixu nel campu de la llingüística y de la sociollingüística, falaran de la responsabilidá que les nuestres sociedaes acostinen pa evitar la desapaición d'unes llingües que son fonte de derechos ciudadanos y patrimoniu cultural de les comunidaes. Un problema inxertáu dafechu del debate intelectual y social d'esti entamu del sieglu XXI.

La primera d'esti ciclu de conferencies va dala Felix Martí i Ambel, director del Centru UNESCO de Cataluña, Profesor del Institutu de Teoloxía de Barcelona, responsable del área de llingües minoritaries y Director del Informe UNESCO sobre les llingües del mundu. La cita pa esta interesante conferencia ye'l día 11 d'avientu, a les 19,00 hores nel salón d'Actos de la Biblioteca Pública "Ramón Pérez de Ayala", na uvieína Plaza'l Fontán.