La fundación Belenos va estudiar la mitoloxía asturiana nes sos xornaes añales

La Puela d'Ayande va acoyer otra vuelta la que va ser la octava edición del Seminariu d'Estudios Asturianos de la Fundación Belenos. Esti alcuentru, que llega a la so VIII edición, va centrase nesta ocasión nel estudiu de la mitoloxía asturiana.

Les actividaes entamen el sábadu 1 d'avientu a les 10:30 de la mañana cola conferencia d'Alberto Álvarez Peña "La mitoloxía asturiana nel marcu de les mitoloxíes europees". Jesús Suárez López, del Archivu de la Tradición oral del Muséu del Pueblu d'Asturies, va falar esa mesma mañana de "La cervantina bendita y la culebra maldita: raíces profundas de un conjuro asturiano". "Notes de mitoloxía lleonesa"
con Nicolás Bartolomé Pérez , y "Xanes y vírxenes: el cultu a la Buena Señora n'Asturies" de Cristobo de Milio Carrín van ser les otres conferencies del día, que va rematar cola presencia del llaniscu Ramón Sordo Sotres pa falar de "Mitoloxía cántabra: definición, personalidá y parentescu".

El domingu 2 d'avientu siguen les actividaes dende les 11,30 con un conceyu abiertu sobre "Investigación y tradición oral: estáu de la cuestión y nueves perspectives" pa echar el piesllu cola tradicional xinta. El númberu de places disponibles ye de 36 y la xente interesao pue apuntase hasta'l 28 payares, pagando 36 euros de matrícula, con opción p'agospiase en réxime de pensión completa en "La Nueva Allandesa" por preciu de 60 euros.