La Fundación Osu prindó a un furtivu poniendo llazos pa osos en Cangas

Dos vixilantes d'una Patrulla que tien la Fundación Osu Pardu en conceyu de Cangas del Narcea prindaron el pasáu 23 d'avientu en monte a un vecín del conceyu preparando un llazu d'alambre pa cazar osos, una de les dos especies de la fauna asturiana declaraes en Peligru d'Estinción xunto col Faisán Montés.

Según un comunicáu oficial de la mesma Fundación Osu, los fechos asocedieron el pasáu día 23 d'avientu cuando una de les nueve patrulles de la Fundación qu'avecen a controlar los montes de Cangas. El Serviciu de Protección de la Naturaleza de la Guardia Civil (SEPRONA) tramitó la denuncia y na investigación que se fexo apaecieron otros dos llazos más.

Too ello asocedió nun monte que pertenez al Plan de Recuperación de la especie, pero nun ye cosa nuevo. Les patrulles de la Fundación Osu del Altu Narcea lleven yá retiraos nesta seronda 37 d'estos llazos nos conceyos de Tinéu, Allande y Cangas, un llabor nel que la mesma Fundación diz que foi fundamental la collaboración de les asociaciones de cazadores del occidente asturianu.

Los llazos son una de les trampes que causen más dañu na población d'osos, lo mesmo poles muertes que por amputaciones y minusvalíes nos animales. Anque les trampes prinden osos, otra organización, el Fondu pa la Protección de los Animales Selvaxes (FAPAS) diz que los llazos tamién tienen que ver cola llucha de los ganaderos contra los xabalinos y los corzos, que dañen los praos y dellos cultivos.

Ente los años 1980 y 1994 diéronse nel occidente d'Asturies 36 muertes d'osu, 13 d'elles por culpa de los llazos.