La Fundación Cardín entama una ‘esposición-homenaxe’ al fotógrafu xixonés Joaquín Fanjul

‘Objetivo Villaviciosa’ ye’l nome de la ‘esposición-homenaxe’ a Joaquín Fanjul (Xixón, 1933-2008) que la Fundación José Cardín Fernández va inaugurar esti xueves. Nella van poder vese semeyes rellacionaes col conceyu maliayu.
 
La muestra “ye una reivindicación del talentu de Fanjul y un homenaxe a la so llarga trayeutoria de fotógrafu abiertu a la sorpresa y la revelación del instante, y con capacidaes y recursos múltiples pa facer d’esos momentos efímeros obres d’arte verdaderes”, apunten dende la Fundación. Fanjul, con una parte grande de la so obra tovía inédita, destaca por tar dotáu “pa captar la esencia del paisaxe y la naturaleza xenuina de les coses”.
 
La inauguración de la esposición va celebrase el xueves, a les 19.30 hores, na sala polivalente de la Fundación José Cardín Fernández. La muestra, que va tar abierta hasta’l 31 de xunetu, va poder visitase de martes a sábadu n’horariu de 12 a14 hores y de 18 a 20 hores, y los domingos, de 12 a 14 hores.