La Fundación Belenos, Premiu Serondaya a la Innovación Cultural

L’Asociación Cultural Serondaya, de Cenera, dio a conocer esti sábadu’l fallu del Premiu Serondaya a la Innovación Cultural na so estaya de Ciencies de la Cultura Humana. La Fundación Belenos recibe esti gallardón.

El xuráu convocáu pol coleutivu mierense pa fallar esti premiu decidióse pola Fundación Belenos “pola so contribución innovadora na vertebración del territoriu asturianu y la so proyeición y incorporación a la cultura del atlantismu européu, destacando de forma especial l’usu de la llingua asturiana como ferramienta de comunicación y patrimoniu de la diversidá cultural d’Europa, asina como’l mantenimientu de proyeutos singulares como la revista ‘Asturies, memoria encesa d’ un país’, seminarios d’estudios asturianos, espublizaciones diverses sobre les Ciencias de la Cultura Humana y otros proyeutos que contribuyeron y contribúi al caltenimientu d’ una cultura singular”. El restu de finalistes foron el proyeutu multicultural impulsáu pol músicu belga Michael Azäs, Vox Teris; l’escritor Pedro Olalla; y l’investigador Alberto Vilela Campo. La química Pilar Ardura Fernández presidió’l xuráu, que tuvo compuestu pol escritor y direutor de la Casa de Cultura de Mieres, Ismael González Arias; Fernando Ornosa, responsable del Archivu de Música Tradicional del Muséu del Pueblu d’Asturies; l’historiador Ernesto Burgos Fernández; y el caderagu de Prehistoria, Miguel Ángel de Blas Cortina. Mentes, l’encargáu de Coordinación Interna y Medios de Comunicación de Serondaya, Fulgencio Argüelles Tuñón, fixo’l llabor de secretariu, ensin derechu a votu.

Enantes de dar a conocer esti gallardón, l’asociación cultural de Cenera yá otorgara al conxuntu de música barroca Forma Antiqva el Premiu Serondaya a la Innovación Cultural na so estaya d’Artes. En feches próximes van fallase’l de Lletres y el de Gastronomía.