La Fundación Banco de Alimentos solicita collaboración ciudadana de cara a la campaña de Navidá

La situación económica que vive’l país y qu’afeuta a un bon númberu de families aumentó los pidimientos de comida a la Fundación Banco de Alimentos. Por esti motivu, la institución solicita a la ciudadanía donaciones de cara a la Navidá.
 
“Nos meses últimos y de cara a la llegada de la Navidá, la demanda d’alimentos disparóse”, señalen dende la Fundación, conformada por voluntarios que trabayen pa evitar l’espilfarru de comida y pa que les persones que nun tengan recursos suficientes puedan tener una vida conforme a la dignidá humana. Ante esta situación complicada por mor de la crisis económica, la institución benéfica tien en marcha una campaña de recoyida d’alimentos nes que tien la collaboración de dellos hipermercaos y na qu’esperen llegar a los 25.000 quilos de comida pa satisfacer la demanda. D’esta forma, los interesaos en ayudar a les cerca de 15.000 persones con necesidaes n’Asturies van poder facelo en puntos establecíos dientro d’estes grandes superficies en díes concretos del mes de payares.
 
Esti sábadu, los voluntarios de la Fundación van tar presentes nel Carrefour Azabache (Siero) y nel Carrefour Los Fresnos (Xixón); el día 12, nel Carrefour Los Prados (Uviéu), Carrefour La Calzada (Xixón) y Carrefour Parque Astur (Corvera); el día 19, nel Hipercor Salesas (Uviéu); y el día 26, nel Hipercor Costa Verde (Xixón) y Hipercor Avilés. Estos centros comerciales tomen el relevu de los supermercaos d’Eroski y Alimerka, que collaboraron n’ochobre cola institución benéfica.