La Fundación Aula de las Metáforas inaugura’l xueves la so Biblioteca de Poesía Asturiana

El proyeutu de la Fundación Aula de las Metáforas de crear una Biblioteca de Poesía Asturiana yá ye una realidá. Esti xueves, a les 19.30 hores na capilla de los Dolores de Grau, va celebrase la inauguración d’esta iniciativa.
 
D’esta forma, la Fundación incorpora una biblioteca dedicada de forma única a la poesía fecha nel país, que se suma a la biblioteca de poesía catalana cola que yá contaba l’Aula gracies a la so collaboración col Institut Ramón Llull. Nel actu d’inauguración tienen prevista la so participación Consuelo Vega, direutora de Política Llingüística; Antonio Rey, alcalde de Grau; Ángela Sánchez Vallina, presidenta del Gremiu d’Editores d’Asturies; y Fernando Beltrán, presidente de la Fundación.
 
Los Hermanos Valle Roso y el pianista Xaime Arias van completar esti eventu con una actuación musical na que los dos cantantes de tonada llangreanos van interpretar cantares basaos en poemes d’autores asturianos.