La fuelga de los sindicatos sanitarios va tener diez xornaes de duración

Los sindicatos sanitarios van celebrar diez xornaes de paru ente’l 16 d’ochobre y el 7 de payares. Unos 16.000 trabayadores tán llamaos a la fuelga, que va ser de xornada continua, según informaron esti xueves.

SICEPA-USIPA, SATSE, USAE, UXT y CC OO afirmaron que’l conseyeru de Sanidá, Faustino Blanco, "mintió" porque nun amosó nengún tipu de voluntá de negociación p’algamar un alcuerdu. Tamién reprocharon al presidente del país, Javier Fernández, que tuviera "desapaecíu" mientres el tiempu que dura’l conflictu. Los sindicatos piden el caltenimientu del emplegu público y tán en contra de les condiciones de trabayu del turnu nocherniegu que plantega’l Gobiernu.

Según aseguren les organizaciones, tovía esta mañana trataron de llegar a un alcuerdu cola Alministración, ensin ésitu. Falen de que hasta 400 persones pueden "dir a la cai" si prosperen las reformes tal y como tán planeaes.

Ensin agua caliente

Los delegaos sindicales zarraos na sede del Serviciu de Salú del Principáu d’Asturies (SESPA) per 29 díes pidieron la dimisión de Faustino Blanco y acusaron a la secretaria xeneral del SESPA, Angelina Álvarez, de corta-yos l’agua caliente y de tratar d’impedir que se-yos treslladase ropa d’aseu. "Dasnos pena, Angelina; que te vaya guapo", dixeron nun actu nel edificiu qu’acueyes les oficines del organismu.