La FSA reconoz que va ser difícil sacar alantre la reforma estatutaria nesta llexislatura

Esta mañana, el presidente del Conseyu Consultivu d'Asturies, Bernardo Fernández, dio anuncia de que l'organismu que preside taba rematando'l dictame que-y encargare'l Gobiernu asturianu sobre la reforma del estatutu d'autonomía, nel que se respuende a les entrugues que nel so día ficiere'l Gobiernu. La fecha prevista pa la entrega d'esti informe ye'l 25 d'abril, y darréu d'ello la Xunta Xeneral del Principáu tendría de nomar una comisión especial encargada del procesu de reforma del estatutu d'autonomía d'Asturies, pero too apunta a que'l procesu de reforma estatutaria, que de mano se camentaba que diba facese nesta llexislatura, va espurrise nel tiempu más de lo previsto.

Ello ye por causa de la negativa del Partíu Popular a entrar nesi procesu de reforma. Esta negativa, que yá espresaren delles vegaes los máximos dirixentes del PP asturianu, Ovidio Sánchez y Reinerio Álvarez Saavedra, y qu'ayeri mesmo repitiere'l presidente de los populares asturianos, afirmando que los sos diputaos nun van participar na comisión de reforma estatutaria, llevó al portavoz del grupu socialista na Xunta Xeneral del Principáu Fernando Lastra, a reconocer que la llexislatura actual va escosar ensin que puea sacase alantre la reforma del estatutu. En declaraciones al diariu de Xixón El Comercio, Lastra enfatábase en que, de cualquier manera, fuere posible entornar la voluntá de los populares.

Ello ye qu'anque efectivamente s'ellabore una propuesta de reforma d'estatutu p'Asturies el PP cola so negativa a participar nel procesu, que vien mandada pola so estratexa política en to estáu, pue torgar l'aprobación de la reforma en cuantes qu'esta precisa del votu al favor de les trés quintes partes de la cámara autonómica pa pasar darréu a instancies del Congresu de los Diputaos.