La FSA-PSOE ganaría les eleiciones y la izquierda podría algamar los 27 diputaos

El CIS dio a conocer esti xueves la datos del macrobarómetru eleutoral pa les eleiciones del 26-M. N’Asturies ganaría la FSA-PSOE con hasta 18 diputaos, mentes que la izquierda podría algamar los 27 escaños necesarios pa reformar l’Estatutu d'Autonomía.

La candidatura liderada por Adrián Barbón recibiría, según la tabla que recueye votu y simpatía, un 26,5 por cientu de los votos, siendo’l PP la segunda fuercia, con un 17,7 por cientu. Podemos rexistraría un 8,2 por cientu; Ciudadanos, un 6,9 por cientu; Asturies pela Izquierda (Izquierda Xunida-Izquierda Asturiana), un 6,7 por cientu; y Foro, un 1,2 por cientu, que lu dexaría ensin representación.

N'estimación de votu, los datos del CIS dan a la FSA-PSOE un 30,8 por cientu del total sobre votu válidu, por un 20,4 por cientu del PP. Podemos queda nun 17 por cientu y Asturies pela Izquierda nun 11 por cientu, superando a Ciudadanos, que lleva un 10,7 por cientu.

VOX algama un 4,6 por cientu y Foro, un 3,7 por cientu.

Repartu d'escaños

No que se refier al repartu d’escaños, la FSA-PSOE sumaría ente 15 y 18 diputaos (anguaño tien 14), mentes que’l PP caltendría los 11 actuales al estimar la encuesta del Centru d’Investigaciones Sociolóxiques (CIS) 10 o 11 diputaos. Podemos algamaría ente 7 y 9 (anguaño cuenta con 9) y Asturies pela Izquierda 4 o 5 (5), polo qu’estos trés partíos, favoratibles a la oficialidá del asturianu, podríen algamar los 27 parllamentarios necesarios pa reformar l’Estatutu d’Autonomía pa incluyir esti derechu.

Ciudadanos algamaría ente 4 y 5 (3) y Carmen Moriyón, candidata de Foro (3) y alcaldesa de Xixón, nun entraría na Xunta Xeneral. Si lo podría facer VOX, al que la encuesta-y da ente 0 y 1 diputáu.