La FSA-PSOE gana con superioridá y Barbón va ser el presidente del país

|
Adrián Barbón vota

Con 20 diputaos, el doble que’l principal partíu de la oposición, el PP (10), la FSA resultó ganadora de les eleiciones nacionales. Adrián Barbón va ser el presidente del país nos cuatro años próximos, sustituyendo nel cargu al tamién socialista Javier Fernández.

Col 99,37 por cientu escrutáu, el llavianés sumó’l 35,24 por cientu de los votos, pol 17,55 de la popular Teresa Mallada. Ello supón una medra de 6 escaños (26,48 por cientu del total de votos nel 2015) por una perda de 1 pal PP (21,49 por cientu).

Ciudadanos pasa a ser la tercer fuercia del país, superando a Podemos, pero queda lloñe de les sos aspiraciones. La candidatura de Juan Vázquez pasa de 3 a 5 diputaos, con un 13,98 por cientu de los votos (7,12 por cientu).

La mayor baxada rexístrala Podemos, que pierde más de la metá de la so representación baxo’l lideralgu de Lorena Gil. De los 9 que tenía nel 2015, cuando rexistró un 19,06 por cientu de los votos, queda con 5 (11,01 por cientu).

Asturies pela Izquierda, la coalición d’Izquierda Xunida (IX) y Izquierda Asturiana (IAS), tamién sufre un retrocesu con Ángela Vallina como cabeza de llista. Pierde 3 diputaos al pasar de 5 (11,94 por cientu) a 2 (6,61 por cientu).

Un resultáu mui asemeyáu foi’l de Foro, que pierde 1 diputáu. La candidatura de Carmen Moriyón queda con 2 y un 6,53 por cientu del total de votos (8,19 por cientu nel 2015).

Entra per primer vegada na Xunta Xeneral VOX, con 2 escaños tres pasar de rexistrar un 0,59 por cientu de los votos nel 2015 a un 6,43 por cientu. El primer partíu estraparllamentariu ye’l Partido Animalista contra el Maltrato Animal (PACMA), con 0,65 por cientu de los votos, cifra dalgo inferior a la del 2015 (0,73 por cientu).

Andecha Astur aumenta apoyos nestes eleiciones (d’un 0,18 a un 0,30 por cientu, superando los 1.500 votos), anque entovía mui lloñe de tener aspiraciones d’entrar nes instituciones. La participación nestes eleiciones foi del 62,37 por cientu, superior a la del 2015 en siete puntos (55,79 por cientu).

El porcentaxe de votu en blancu ye del 1,10 por cientu (1,89 por cientu), y el de votu nulu del 0,94 por cientu (1,42 por cientu).

Contador Estadistiques