La FSA-PSOE critica la poca presencia de muyeres nel Gobiernu

Carmen Sanjurjo, secretaria d’igualdá de la FSA-PSOE, y la diputada Mariví Monteserín criticaron la poca presencia de muyeres nel Gobiernu d’Álvarez-Cascos. Seis de los nueve conseyeros son homes y nun hai nenguna viceconseyera.
 
“Creo que la formación del Executivu pon n'evidencia'l papel que dende Foro Asturias quier dase a les muyeres”, dixo la tamién senadora Sanjurjo, que, a la espera de les polítiques qu'en materia d'Igualdá tenga previsto desarrollar FAC, lo que-y queda claro ye que na formación del Gobiernu “hai una involución clara que los socialistes llamenten”. Nesti sen, recordó que'l PSOE siempre lluchó “por algamar grandes cuotes d'igualdá” y añadió que llamenta l'ausencia de muyeres nel Gobiernu, “non sólo por representatividá”, sinón porque consideren que ye importante contar cola “capacidá y el talentu” del xéneru femenín.
 
Pela so parte, Monteserín indicó que la reflexón de fondu que pue facese ye que “coles fuercies conservadores nunca se llega a un ámbitu d'igualdá”. Sicasí indicó que la meyora de les muyeres en toos y caún de los ámbitos “nun tien marcha atrás” y llamentó qu'Álvarez-Cascos vaya en contra de la historia. "Creo que la derecha equivócase cuando sigue queriendo caltener ciertos privilexos que yá nun comparte la ciudadanía”, dixo.