La FSA inclúi nel so programa una cooficialidá “basada nel alcuerdu y el consensu”

|
La FSA inclúi nel so programa una cooficialidá “basada nel alcuerdu y el consensu”

El programa de la FSA-PSOE pa les eleiciones del 26-M inclúi la necesidá d’abordar “el reconocimientu oficial de la llingua asturiana” buscando un modelu “construyíu sobre la base del alcuerdu y el consensu”. La so redaición recuerda a la de Foro nel 2015.

Como se comprometió’l so secretariu xeneral y candidatu a la presidencia, Adrián Barbón, la FSA-PSOE inclúi nel so programa eleutoral la oficialidá del asturianu, anque d'una manera un tanto ambigua. El puntu 186 del mesmu espresa, en castellanu, que “Asturies ye rica nel so patrimoniu cultural, tanto material como inmaterial. Patrimoniu cultural, herencia de la nuesa historia, que debemos cuidar y protexer. Ente esi patrimoniu a protexer ta la sobrevivencia de la llingua asturiana, en peligru de desaniciu. Pa ello, dientro del marcu constitucional y la proteición xurídica qu’ufre a les distintes llingües d’España, na llexislatura próxima Asturies deberá abordar l’alderique sobre la reforma del Estatutu y, poro, sobre’l reconocimientu oficial de la llingua asturiana, buscando un modelu que se carauterice pola proteición, la voluntariedá y la non imperatividá, construyíu sobre la base del alcuerdo y el consensu. Mientres tanto desarrollaremos la Llei d’Usu y Promoción del Asturianu”.

El testu aseméyase enforma al del programa eleutoral de Foro nel 2015, enantes de que’l partíu se desplazara a postures menos favoratibles p’hacia l’idioma. “Apoyaremos, cuando se dean les circunstancies polítiques y el consensu social necesariu que permitan la reforma del nuesu estatutu d’autonomía, la modificación del so artículu 4 pa incluyir la oficialidá, tal como se recueye nel artículu 3.2 de la Constitución española”, rezaba’l documentu del partíu asturianu.

Hasta la fecha, Foro entovía nun dio a conocer el conteníu de la estaya ‘Cultura’ del so programa eleutoral.

Otros puntos

El programa de la FSA tamién inclúi otros puntos al respeuto l’asturianu que siguen la llinia de les propuestes socialistes n'otres convocatories eleutorales y nun suponen pasos alantre na promoción y usu del idioma:

  • 187. Finaremos l’afitamientu de topónimos tradicionales respetando la voluntá de los conceyos asturianos.
  • 188. Sofitaremos el trabayu de l’Academia de la Llingua Asturiana.
  • 189. Fomentaremos l’usu de la llingua asturiana nos medios de comunicación, sobre manera na RTPA.
AdxuntuTamañu
PDF icon Programa eleutoral FSA 26-M 20191.32 MB
Contador Estadistiques