La FSA ganaría les eleiciones n’Asturies con un resultáu mui asemeyáu al del 2015

|
Encuesta electoral Asturies 2019

Una encuesta eleutoral de SyM Consulting da la victoria n’Asturies a la FSA, que mantendría o perdería un diputáu, y frena les aspiraciones de crecimientu de Ciudadanos al ganar namái un o dos parllamentarios. Los partíos favoratibles a la oficialidá superaríen los 27 escaños necesarios pa reformar l’Estatutu d'Autonomía.

Esta estimación de votu de cara a les nacionales que se van celebrar l’añu viniente fíxose ente los díes 10 y 12 de marzu al traviés d’encuestes teléfoniques, siendo’l total válidu de 1.078. Hai que tener en cuenta que l’estudiu faise como si Asturies fora una circunscripción única, polo que podría haber delles variaciones si los resultaos s'axuntaren a les  trés circunscripciones que tien Asturies.

La Federación Socialista Asturiana (FSA) ganaría les eleiciones aumentando nun puntu’l porcentaxe de votu: del 26,48 por cientu del 2015 al 27,6. Esta medra nun-y permitiría medrar n’escaños, cola posibilidá inclusive de perder ún de los 14 que tien anguaño.

La segunda fuercia más votada sería’l Partido Popular, que perdería votos (d’un 21,59 a un 20,83 por cientu) y un diputáu (de 11 a 10). Igualaríen a escaños Podemos (19,06-16,10 por cientu) y Izquierda Xunida (11,94-14,55 por cientu), que perderíen y ganaríen 2, de manera respeutiva.

Ciudadanos pasaría del 7,12 por cientu de l’anterior cita coles urnes a un 10,10 por cientu, algamando la mayor xuba xunto cola de la coalición, pero quedando con ente 4 y 5 escaños polos 3 actuales. Mentes, Foro consiguiría caltener presencia na Xunta Xeneral pese a pasar d’un 8,19 por cientu de los votos a un 5,88, perdiendo un parllamentariu pa quedar con 2.

Superaríense los 27 escaños necesarios pa la reforma estatutaria

La posibilidá de reformar del Estatutu d’Autonomía pa incluyir la oficialidá, colos datos que da esti sondéu eleutoral, sería una realidá si PSOE, IU y Podemos lleven esta reforma nel so programa, al superar los 27 diputaos necesarios pa ello; la encuesta da-yos ente 27 y 29 a la suma de les trés fuercies. Si amás de los parllamentarios de la FSA (14), Podemos (7) y Izquierda Xunida (7) axuntáremos a Foro (2),  la cifra total sería de 29 o 30 escaños.

Nel gráficu, la representación de los escaños qu'amuesa la web d'Electrograph.

Contador Estadistiques