La FSA entama un concursu de microrrellatos pola Selmana de les Lletres

La iniciativa ta pensada pa usuaries y usuarios de la rede social Twitter, que tienen hasta'l día 28 pa espublizar hasta dos creaciones.

La Secretaría d'Educación, Universidá y Normalización Llingüística de la Federación Socialista Asturiana (FSA) convoca'l primer Concursu de Microrrellatos en Twitter Selmana de les Lletres na FSA-PSOE "col oxetivu de llanzar un mensaxe nes redes sociales al rodiu de la celebración del XXXIX Día de les Lletres Asturianes". La temática ye llibre y nun pue pasar de los carauteres permitíos por Twitter, esto ye, 280 carauteres, incluyida la etiqueta #SelmanaLletresFSA que se debe de sumar al testu.

Pa poder participar nel concursu ye necesario siguir la cuenta de la FSA (@FSA_PSOE), finando'l plazu de presentación de trabayos a les 23.59 hores del día 28. Los microrrellatos, un máximu de dos per persona, van ser valoraos por un xuráu conformáu por Esther Prieto, Inaciu Galán, Miguel Barrero y María Luz Pontón.

La recompensa pa los ganadores va ser un llote de llibros n'asturianu, que se van entregar el día 2 de mayu, a les 19 hores, nun actu na Biblioteca d'Asturies Ramón Pérez de Ayala, asitiada n'El Fontán. Nesti enllaz pue consultar les bases pa participar nel concursu.