La FSA diz que la francedura de les negociaciones con IX-BA-LV “nun tien torna”

El secretariu d'Organización de la Federación Socialista Asturiana, Jesús Gutiérrez, refugó ayeri toa posibilidá de que la so formación fexere una ufierta nueva a IX-BA-LV pa la formación de gobiernu n'Asturies, dempués del ofrecimientu que fexere Jesús Iglesias. El responsable de la FSA echóo-y la culpa a la coalición de nun aceptar la "ufierta razonable" que se-y presentare y aseguró que'l so partíu ta pa iguar los problemes de los asturianos y non los d'IX.

Les declaraciones del secretariu socialista tuvieron llugar el día enantes de que na Xunta Xeneral del Principáu entame'l debate pa la investidura de Vicente Álvarez Areces como Presidente asturianu por tercer llexislatura siguida. El nomamientu del socialista, anque va tener qu'esperar a la segunda votación del llunes por carecer de mayoría absoluta, ye seguru en cuantes que'l lider de la oposición, Ovidio Sánchez, anunciare que nun va presentase.