La FSA amuesa la so disposición a modificar el reglamentu de la Xunta Xeneral “pa dar respuesta a lo qu’asocedió" na Comisión de Cultura

|
Dolores Carcedo

Dolores Carcedo, vocera del grupu socialista, calificó de “sobreactuación” la posición de PP, VOX y Ciudadanos na Comisión de Cultura y amosó la disposición de la FSA de modificar el reglamentu de la Xunta Xeneral “pa dar respuesta” a estes situaciones. Asturies pela Izquierda rexistró’l miércoles una propuesta pa garantizar l’usu del asturianu na Cámara.

Tres un alderique llargu na Xunta de Voceros, na que’l tema llingüísticu ocupó gran parte del tiempu, Carcedo confirmó que’l so grupu parllamentariu “va buscar la fórmula más afayadiza pa dar solución a esta situación, qu’hasta agora se producía con normalidá y ensin nengún tipu de conflictu”. El momentu va ser l’alderique previstu sobre’l reglamentu de la Cámara, “que ye del añu 97 y va abordase de manera xeneral”.

Asturies pela Izquierda, mentes, rexistró ayeri mesmu una propuesta pa la modificación del mesmu “pa garantizar la posibilidá del usu del asturianu por cualquier persona nel Parllamentu autonómico y evitar que, como asocedió ayeri –por antayeri–, nengún grupu pueda impedir que comparecientes ensin acta de diputáu puedan utilizar la llingua vernácula”. La so vocera, Ángela Vallina, indicó que “mientres 28 años nun hebo problemes, pero les dereches de PP, Vox y Ciudadanos punxéronse d’alcuerdu pa xenerar un conflictu llingüísticu que nun esiste na cai. Aprovecharon un vacíu nel reglamentu de la Cámara pa impedir que la conseyera Berta Piñán usara l’asturianu”.

En concreto, la coalición d’IX y IAS solicita cambiar el testu del artículu 11 pa qu’esprese que “nel marcu de lo dispuesto pol Estatutu d’Autonomía y, nel so casu, pola llexislación que lo desendolque, tanto los diputaos nel exerciciu de les sos funciones parllamentaries como cualquier otra persona que compareza énte la Cámara podrán utilizar el bable/asturianu”. Vallina considera que “la oficialidá ye imprescindible si, de verdá, queremos garantizar l’usu del asturianu y el so propiu futuru” y diz “tar convencida” n’algamar un consensu al rodiu la cuestión cola incorporación d’otres fuecies al mesmu “si se siguen produciendo episodios como’l d’ayeri –por antayeri–”.

Restu de reaiciones

Foro foi la única de les formaciones de dereches que mantuvo un posicionamientu alloñáu del de PP y VOX, yá que Ciudadanos tamién torgaría a Piñán l’usu del asturianu avanzada la Comisión de Cultura, Política Llingüística y Cultura. La idea que vien defendiendo esti partíu, que nel so programa diz ser favoratible a la oficialidá cuando haya dichu consensu, ye que l’asturianu nun se convierta nuna fonte de conflictu que perxudique al propiu idioma.

Mentes, Laura Pérez Macho, vocera de Ciudadanos, quixo dar la vuelta a la tortiella y refirióse a la falta sufrida’l martes por Piñán como “una puesta n’escena del Gobiernu”. Tamién defendió la interpretación fecha del reglamentu y l’usu de la llingua “oficial” nel casu de qu’haya un diputáu que diga nun entender l’asturianu.

Pela so parte, Lorena Gil, de Podemos, calificó la situación asocedía na comisión de “esperpéntica”. Tuvo presente na sala xunto col diputáu Rafael Palacios, únicu que llevantó la voz nel momentu de la interrupción de la intervención de la conseyera pa protestar pola vulneración que se dio de la Llei d’Usu y Promoción del Bable/Asturianu y de la Constitución al togar a Piñán l’emplegu de la so llingua materna na Cámara.

Na imaxe, Carcedo nuna intervención de la Xunta Xeneral n'avientu cuando yera conseyera de Facienda y Sector Públicu. Semeya obra d'Armando Álvarez.

Contador Estadistiques