La FSA algama un alcuerdu con IX pal apoyu a Javier Fernández na investidura

La coalición va consultar coles bases esti pautu a finales de selmana- Nun hai alcuerdu sobre la oficialidá de la llingua asturiana- El pautu inclúi un "Plan de Rescate Social" y revertir iniciatives del PP como la LOMCE.

El principal compromisu de la FSA ye la reforma de la Llei Eleutoral, anque tamién ta la postura de nun recurrir la sentencia sobre la incineradora, buscando una alternativa más ecolóxica que la quema de residuos. D'igual forma, hai voluntá de crear una axencia preventiva contra la corrupción y una comisión sobre l’ampliación d’El Musel.

No que nun hai alcuerdu ye na necesidá d'una reforma estatutaria nin na oficialidá del asturianu, con postures totalmente contraries entes les dos formaciones polítiques. El compromisu nesti campu ye buscar alternatives pa protexer l’idioma, según comentó na so cuenta de twitter Gaspar Llamazares.

Más puntos del alcuerdu

Según IX, esta formación "arrincó al PSOE'l compromisu de llevar a cabu midíes pal Rescate Social y de refuerzu de los servicios públicos, qu'inclúi la puesta en marcha “yá” d'un Plan de Llucha contra la probeza enerxética, otru de Llucha contra la Probeza infantil, un Plan de Garantía de busca de Soluciones Habitacionales pa persones que sufren un desahuciu y unu de meyora y axilidá del salariu social", midíes qu'acordies cola coalición "terminaríen nel primer periodu de sesiones de 2016 cola aprobación d'una Llei de Derechos Vitales Básicos, que recueya los derechos de los asturianos.

El coordinador d'IX, Manuel Orviz, comentó tamién que nel alcuerdu "figura'l compromisu de revertir iniciatives del PP que perxudiquen a Asturies, tales como la LOMCE o la esclusión de la sanidá pública d'una parte de la población, y el copagu de melecines per parte de los xubilaos, según los que dependiendo de l'alministración autonómica suponen l'afitamientu de los servicios públicos y la meyora de la calidá nel serviciu y nel planu llaboral, el refugu a les privatizaciones y externalizaciones y que'l tercer sector sía la única alternativa a la xestión pública nos servicios sociales".

La investidura

Col apoyu d’IX, Javier Fernández sumaría 19 votos, lo que va dar la presidencia del país al socialista, yá que la suma de los de la derecha llegaría namái a 17. Too paez indicar que Podemos va astenese énte la falta d’alcuerdu de la FSA nel Plenu d’Investidura, que va celebrase a mediaos de la selmana qu’entra.