La Foz celebra’l domingu’l certame del quesu Afuega’l Pitu

Esti domingu va celebrase en La Foz el ‘XXXIV Certamen del Quesu Afuega’l Pitu’. Les queseríes van competir por llevar el premiu en cualquier de les cuatro variedaes y los asistentes van poder prebar y mercar esti productu con DOP.

La Hermandad de La Probe entama esti certame, en collaboración col Conceyu de Morcín y la Conseyería d’Agroganadería y Recursos Autóctonos, qu’atrae tolos años a una cantidá grande de xente a La Foz pa disfrutar d’esti popular quesu. L’actividá va principiar a les 11.30 hores cola apertura oficial de la fiesta pol alcalde Jesús Álvarez Barbao, a la que va siguir una demostración pública de la ellaboración d’Afuega’l Pitu a cargu de l’artesana llocal Margarita Mier. Tres una exhibición de deporte rural por parte del equipu Monte Areo de Carreño, a les 13 hores va procedese a la entrega del gallardón ‘Quesero mayor de Asturias’ a Quesera del Cares y Vega de Tordín de Cabrales en solidaridá cola catástrofe d’Arenas del 2012, y darréu, el del ‘Afuega’l Pitu de Oro’ a José Antonio Campoviejo “por su constante promoción de los quesos asturianos y, n’especial, del Afuega’l Pitu”. El cocineru del restaurante parragués El Corral del Indianu revela nel palmarés d’esti gallardón al so colega Nacho Manzano (Casa Marcial y La Salgar).

Pa les 13.30 hores ta previsto la llectura del pregón de la fiesta, del qu’esti añu va encargase’l tamién cocineru y consultor gastronómicu Lluis Nel Estrada, pa depués dar a conocer a los ganadores del certame nes sos cuatro variedaes: roxu de trapu, blancu de trapu, atroncáu roxu y atroncáu blancu. Pa finar, va entamase la puya de los cuatro meyores quesos y procedecese a la entrega de premios del ‘I Concurso los Nabos en la Cocina’, qu’entama la Cofradía de Amigos de los Nabos y la Escuela d’Hostelería IES Valle Ayer, asina como’l Nabu de Plata al agricultor Sergio Menéndez García por caltener viva la tradición de cultivar esta hortalexa pa la fiesta de San Antón, patrón de La Foz, que tien llugar mañana. Tamién van tar a la venta, dende l’entamu de la celebración, casadielles feches polos alumnos de la Escuela del Gremio de Artesanos del Principado de Asturias.

Otra manera, coincidiendo col certame d’esti quesu con Denominación D’Orixe Protexida (DOP), dellos restoranes de la zona van servir pote de nabos, casadielles y Afuega’l Pitu. Éstos son: La Moncloa, María’s, La Casa Nueva, La Gortica, L’Angleiru, El Castillo y Embalse Alfilorios (Morcín); Monte Aramo, El Puente, El Oreván, Casa Chus y El Hogar (Riosa); Llagar de Baíña (Mieres); Lobato (La Ribera); y La Cava de Floro y Casa Chema (Uviéu).

Na semeya, Afuega'l Pitu atroncáu roxu. Imaxe del Conseyu Regulador de la DOP Afuega'l Pitu.