La formación sanitaria especializada va contar con 33 places más

La ufierta pal cursu viniente amplíase hasta les 232 en 73 unidaes docentes.

El Gobiernu va ufiertar 232 places de formación sanitaria especializada el cursu próximu, 33 más qu'esti añu y una de les cifres más altes de los exercicios últimos. La xuba media de puestos supera'l 16 por cientu, pero nes árees de Medicina, y Enfermería familiar y Comunitaria la medra algama'l el 40 y el 30 por cientu, de manera respeutiva.

El conseyeru nuevu de Salú, Pablo Fernández Muñiz, participó güei nel Plenu de la Comisión de Recursos Humanos del Sistema Nacional de Salud. Tres el mesmu destacó “el compromisu firme del Gobiernu d'Asturies pola formación de profesionales como garantía de la meyor atención a los pacientes” y agradeció al Ministeriu de Sanidá l'aprobación de les places nueves.

La formación sanitaria especializada impártese nel país en 73 unidades docentes: 40 nel Hospital Universitariu Central d'Asturies (HUCA), 20 en Cabueñes Hospital Universitariu, 6 nel Hospital Universitariu San Agustín, una nel Hospital Monte Naranco, otra nel Hospital Valle del Nalón –inactiva anguaño–, una de Medicina Familiar y Comunitaria, una de Salú Llaboral,  una d'Enfermería Obstétrico-xinecolóxica, otra de Medicina Preventiva y Salú Pública, y una más de Salú Mental, mentes que l' hospital concertáu de Xove, en Xixón, inclúi una de Medicina Interna. Entes les novedaes destaca la creación d'una unidá docente d'Endocrinoloxía y Nutrición pa Cabueñes.

L'ampliación de les places de formación ye una de les aiciones que s'impulsan dende les distintes alministraciones pa redimensionar les plantiyes de profesionales y afrontar con meyores recursos el cambiu xeneracional nel sistema sanitariu públicu.