La Folixa na Primavera de Mieres nun va tener actuaciones internacionales

La edición d’esti añu de la Folixa na Primavera de Mieres va tar protagonizada por grupos asturianos. Corquiéu y Macadamia van abrir les actuaciones del vienres, 8 d’abril, mentes que’l sábadu’l turnu va ser pa Blima y La Coḷḷa Propinde.
 
La situación económica actual llevó al Consistoriu mierense a abrochase’l cintu y apostar por una Folixa na Primavera ensin presencia de grupos de fuera del país, como yera vezu nesti eventu que da ainiciu a un calendariu festivu repletu de fiestes en toda Asturies. Ello nun quita pa que’l cartelu d’esti añu sía d’una calidá mui alta, puesto que les cuatro formaciones que van xubise al escenariu del parque Xovellanos tán ente les meyores de la escena asturiana.
 
El vienres 8 d’abril, Corquiéu y los mierenses Macadamia van abrir les actuaciones de la Folixa na Primavera, mentes que’l sábadu ta confirmada la presencia de Blima y La Coḷḷa Propinde. Les dos xornaes de conciertos van principiar a les 23 hores y nun va faltar la carpa con sidra pa disfrutar ente cantar y cantar de la bébora tradicional del país. Mañana, a les 12 hores, va facese oficial el programa completu d’actividaes de la Folixa en Viḷḷapindi, onde va celebrase la I Muestra de la Sidra.