La Folixa na Primavera axunta en Mieres música, tradición y gastronomía

El Parque Xovellanos va ser un añu más l’epicentru de la Folixa na Primavera, festexu qu’axunta esta fin de selmana en Mieres música, tradición y gastronomía. Los irlandeses Lúnasa encabecen la estaya musical, que completen Rubén Alba, Los Berrones y Skama la Rede.

La Folixa na Primavera va comenzar mañana, a les 19.10, col chupinazu d’aniciu y el primer espiche de los toneles de sidra. En total, van repartise de baldre 3.000 llitros de sidre, pa lo qu’hai que mercar el vasu del certame, que tien un costu de 3 euros.

El pregón va lleelu nesta ocasión José Carlos Muñiz Fernández, presidente de l’Asociación Mierense de la Cocina Solidaria (AMICOS), mentes que pa les 19.45 ta prevista la entrega a Xuacu Amieva del XVIII Distintivu a la Investigación Folclórica Fini Suárez “pol su trabayu como recuperador del patrimonio cultural asturianu”. El festival de tonada va comenzar a les 20 hores colos intérpretes Liliana Castañón, Eloy López Cuello, Odón García González y José Manuel García, y los gaiteros Belén Arboleya, Rodrigo Fernández Joglar y Andrea Fernández Joglar.

La música va siguir cola actuación de la Banda Gaites Villa de Mieres y los cantares de chigres na sidreríes Barolaya y Solana, pa depués dar pasu nel escenariu principal a les actuaciones nuecherniegues de la Folixa na Primavera. Nesta primer xornada van tocar dos formaciones que tán de xira especial d’aniversariu: en primer llugar, a les 23 hores, van tocar Los Berrones, que cumplen trenta años sobre los escenarios, y darréu, a la 1, Skama la Rede, que lleva 15 años faciendo baillar cola so música.

Referente de la música tradicional irlandesa

L’actividá el sabadu va comenzar a les 9 hores cola venta de la Bolla de la Folixa na carpa de la fiesta. Al meudía va comenzar la preba de sidra y va haber animación musical, primero col Grupu de Baiḷḷe Ruxidera y depués cola Banda de Gaitas Marino Tapiega, la Banda de Música Mieres del Camín y les bandines El Busgosu y Los Gascones.

De tarde, a partir de les 17 hores, Seis Conceyos va poner xuegos y deportes tradicionales pa neñes y neños, y una hora más tarde van actuar los grupos folclóricos Peleriños de Sarria (Galicia) y L’Artusu. A les 19 hores va ser l’alcuentru de bandes da gaites con Villa de Mieres, Marino Tapiega, Ciudad de Oviedo y El Gumial, que van dar pasu a les actuaciones nocherniegues.

Va encargase d’abrir los conciertos a les 23 hores el gaiteru avilesín Rubén Alba, que presenta na Folixa na Primavera'l so primer álbum, ‘Despertar’. Darréu, al rodiu de la 1, va xubir al escenariu’l grupu estrella d’esta edición, los irlandeses Lúnasa, que s’estrenen en Mieres.

Nacida nel añu 1997, ye ún de les bandes referentes de la música tradicional irlandesa, con ocho discos espublizaos, l’últimu ‘Cas’. Anguaño conformen Lúnasa los músicos Seán Smyth, Kevin Crawford, Trevor Hutchinson, Cillian Vallely y Ed Boyd.

Menú gastronómicu

La xornada cabera va centrase na mañana, cola venta de la Bolla de la Folixa dende les 9, nesta ocasión tamién n’El Requexu, el Liceo y La Plaza, y l’espiche de los toneles al meudía. L’animación musical va ponelal’l Grupu Folclóricu Prau Llerón y El Busgosu y Los Gascones, con una amuesa de deporte tradicional dende les 13 hores.

Darréu una bona opción ye disfrutar del menú gastronómicu de la Folixa na Primavera, que van servir dende’l vienres el Barolaya, el Santa Bárbara, La Solana, El Cenador Azul, L’Albar, Casa Óscar, Consistorial, La Violeta, TC28, Alonso, La Posada de Bacus, Seyma, El Maestrante, Casa Fulguencio y Ca’Laura. Ésti compónse de sopa d’ablanes o menestra del tiempu, de primero; bacaláu o cabritu, de segundo; y borrachinos o sorbete de sidra, de postre.