La Folixa la Sidre de Ribeseya va contar con ocho palos nesta edición

La música y la gastronomía protagonicen esti certame dedicáu a la bébora nacional.

A diferencia d'años anteriores, onde namái se podía tastiar un palu na barra de la Folixa la Sidre de Ribeseya asitiada na carpa de la plaza Nueva, nesta ocasión los visitantes van poder disfrutar d'ocho. Entaína Ribeseya, organizadora del eventu, ta acabante de confirmar que van tar presentes Roza, Viuda de Angelón, Orizón, Cabañón, L'Allume, Vallina, Buznego y Fonciello.

La IV Folixa la Sidre de Ribeseya va comenzar el vienres a les 20 hores con una amuesa de cocina marinera, a lo que va siguir la llectura del pregón y el repartu d'un platu de marmita a los asistentes. A les 22 hores ta prevista la primer de les actuaciones musicales programaes, la d'Anabel Santiago, a la que va siguir la banda de versiones pop-rock Avalle Van.

Si'l vienres ye 'marineru', el sábadu va ser 'tradicional', cola celebración de Alcuentru de Grupos de Baille del Oriente a les 13 hores, nel que van participar El Corveru, La Tamarga, Cobijeru y Picos de Europa. A les 18 hores va tener llugar el I Tornéu de Bandes de Gaites Duardo'l Gaiteru de Sardéu, qu'entama la Banda de Gaites Ribeseya y na participen Noega, Conceyu Siero, Villa y Condáu de Noreña, y El Gumial, amás de la berciana Castro Bergidum y El Centru, del Centro Asturiano de Madrid.

Yá de nueche, a les 22 hores, va actuar Jerónimo Granda, pa siguir con P'Amusquis y finar con Tejedor.

Concursu de Sidre Casero

Ún de los aspeutos que pretende potenciar la Folixa la Sidra de Ribeseya ye la ellaboración de sidre casero, polo que'l concursu qu'entama ye'l momentu más esperáu del concursu. Na plaza'l Mercáu celébrense ente güei y mañana les semifinales, na que participen 48 persones, 26 d'elles del propiu conceyu, de los que seis palos van pasar en cada eliminatoria.

Asina, na final del domingu (13 hores) van tar presente un total de 12. Al meudía va comenzar la preba popular de les sidres participantes, siendo necesario mercar el vasu oficial, con un preciu de 3 euros, pa tastiales, momentu nel que Los Gascones van divertir cola so música.

Na tarde del domingu 'caseru' los críos van tener protagonismu con xuegos prehistóricos, danza d'arcos y música, dende les 17 hores. A les 18.30 hores va comenzar el concursu d'echadores de sidre y a les 20 hores va comenzar el festival de tonada, con Óscar Fernández.

Un conciertu de Belo, a les 22.30 hores, y los xuegos populares, a les 23.30 hores, van poner el ramu a la folixa.