La Folixa la Sidre de Ribeseya medra en díes y actividaes

De 3 a 5 díes. La V Folixa la Sidre de Ribeseya programa dende esti miércoles y hasta’l domingu una montonera d’actividaes al rodiu la bébora nacional, destacando na fin de selmana les actuaciones musicales de La Tarrancha, D’Urria y Muyeres con ‘País malva’.

Entaína Ribeseya encárgase d’entamar esta iniciativa que medra añu tres añu. A les 20 hores d’esta tarde va comenzar con cantares de chigre peles sidreríes de la villa que patrocinen el certame, mentes que mañana l’actividá pasa a la carpa instalada onde la Rula dende les 19 hores coles rondes previes de V Concursu de Sidre Caseru de la Folixa la Sidre de Ribeseya, con final prevista pal domingu al meudía cola ambientación musical de La Bandi-Ne y preba de sidra de baldre previa merca del vasu conmemorativu por 3 euros.

Tamién mañana, a les 21 hores, va tener llugar la llectura del pregón, qu’esti añu corre a cargu del cocineru Lluis Nel Estrada. El vienres, mentes, va haber sesión vermú na barra de la folixa, de 13 a 15 hores, onde esti añu va servise sidra de nueve palos, una más que na edición pasada: Viuda de Angelón, Fonciello, La Llume, Buznego, El Cabañón, El Cuchareru, Roza, Orizón y Vallina.

A les 17.30 hores van actuar les alumnes de la escuela de baille de l’Asociación Cultural El Corveru, que cuenten con Marta Elola como maestra, y a les 18 hores va disputase la semifinal del campeonatu de bolos de la folixa, entamaú en collaboración cola Peña Bolística Collera. La xornada va pesllase con dos actuaciones de grupos de versiones musicales, Juanillous 3.0 y Avalle Van, dende les 22 hores.

Primer concursu de gaiteros solistes

La gran novedá d’esta edición de la Folixa la Sidre de Ribeseya ye la celebración del primer Concursu de Gaiteros Gelu Cuervo que s’entama en collaboración de Roberto Suárez ‘Rigu’, maestru de gaita de la Escuela de Música Municipal y miembru de Corquiéu. Nél van participar, dende les 11.30 hores del sábadu, dalgunos de los meyores intérpretes d’esti instrumentu nel país.

Tamién el sábadu, de 11 a 13 y de 17.30 a 21 hores, va instalase na carpa la tradicional Feria de Quesos Artesanos. No que respeuta’l terrén musical, esta xornada va ser el día grande de la Folixa, coles actuaciones dende les 22 hores de Muyeres, col so espectáculu ‘País malva’, el grupu asturlleonés de 'folk tsacianiegu' D’Urria y La Tarrancha, que van facer baillar a los presentos col so mecigayuska.

El domingu, amás del concursu de sidra casero, va tener llugar dende les 18 hores el concursu d’echadores de sidra puntuable pal Campeonato d’Asturies.