La folixa entama col Xueves de Comadres

Les asturianes axunten pa comer y pasar una xornada festiva qu'abre l'Antroxu modernu.

Anque l’orixe d’esta folixa pue tar fuera del Antroxu tradicional, esta cita tan asturiana considérase la primer celebración del Antroxu actual. Xixón y La Pola Siero son les villes que nos años últimos caltienen con fuercia esta tradición que caltuvieron per munchos años les cigarreres de la fábrica de tabacos de Cimavilla.

Éstes, xunto a les sos fíes y collacies, xubíen hasta La Providencia a pasar la tarde en compañía femenina y disfutar de viandes y postres típicos del Antroxu, como naranxes, teresites, frixuelos o casadielles. Mentes, en La Pola les muyeres diben al conocíu como Prau Malatu o Prau Picón a merendar bollos preñaos, sidra y casadielles. Güei, la folixa treslladóse de la tarde a la nueche y munchos restoranes ofrecen menús especiales pa esta xornada.

Premios reivindicativos

Ye de destacar tamién el llabor de la Tertulia Feminista Les Comadres pa potenciar esta fecha festiva, dando-y un toque reivindicativu. Esti grupu de muyeres entama tolos años una espicha na qu’entreguen dos premios: el ‘Comadre de Oro’ y el Felpeyu, ésti últimu a persones o entidaes que desprecien a la muyer. Esta fiesta vien celebrándose nos años últimos na sala Acapulco, onde s’organiza una cena con una actuación.

Nesta ocasiones dos persones van recibir el ‘Comadre de Oro’, relevando nel gallardón a l’activista Amelia Tiganu, que va tar presentes na folixa xunto con Pilar Sánchez Vicente, que recibiera el ‘Comadre de Oro Especial’ l’añu pasáu. Son la escritora y columnista Almudena Grandes, “qu’al traviés de les sos noveles presenta muyeres fuertes, valientes y lluchadores pola llibertá, inclusives nes circunstanciaes peores, y nes sos columnes reflexona y fainos pensar sobre cuestiones actuales de la vida cotidiana que reflexen la situación de les muyeres”, y la escritora y investigadora social Najat El Hachmi, “que dende la so óptica feminista manifiesta, al traviés de los sos escritos, la importancia decisiva d’algama la igualdá ente los sexos en toles cultures”.

Nel llau de los antipremios, el títulu de Felpeyu recala na Real Federación Española de Fútbol (RFEF), “por anteponer los intereses económicos a les muyeres, escoyendo pa la celebración de la Supercopa d’España, Arabia Saudita. ”. Otra manera, Javier García Cabañas, Luciano Méndez Naya, Jesús Sanz Montes y la Universidad de Cádiz tamién tuvieron opciones de recibir esti ‘reconocimientu’ que l’añu pasáu foi pal presidente del Partido Popular (PP), Pablo Casado.

La folixa va comenzar a les 20.30 hores y va consistir nuna cena namái pa muyeres y una actuación d’Assia, con un preciu de 30 euros. Tamién esiste la posibilidá d’acudir sólo al baille, a partir de la medianueche, al que tien accesu’l públicu en xeneral previu pagu d’entrada de 6 euros con consumición incluyida.

Na semeya, cena de comadres de la Tertulia Feminista Les Comadres l'añu pasáu.