La Foguera de Corvera caltiénse, pero con un programa más probetayu

Tres les protestes de munches asociaciones corveranes énte la intención del Conceyu d'acabar cola foguera de San Xuan en Corvera, el Conceyu va entamar una pequeña nueche folk nel embalse de Tresona.

Namás confirmáse' rumor de que'l Conceyu tenía pensao llevar la nueche folk de San Xuan a Les Vegues, onde en cuenta de grupos folk diben contratase orquestes gallegues, munches asociaciones xuveniles decidieron movilizáse escontra esta idea. En pocos díes, el movimientu asociativu corverán algamó más de 1.500 firmes escontra'l cambiu de l'actividá, colo que'l Conceyu vióse forzáu a replantegar la situación, colo que se llegó a una solución de compromisu.

Asina, anque la iniciativa cívica de protesta consiguió que nun marchare'l conciertu de Corvera, el cartel y l'espíritu d'anguaño van ser bien diferentes al de los bonos años anteriores. La nueche va tener la presencia d'una formación de música clásica, "Divertimento", y trés grupos de música folk "Cántara", "Fred Morrison" y "Ástura". Un bon cartel, pero que nun tien na que ver colos d'años anteriores onde pudimos ver a les bandes más importantes de folk asturiano, "Llan de Cubel", "Tejedor", "Xéliba", Felpeyu" y del folk internacional como "Dervish" o "Tanahill Weavers".

La Foguera de San Xuan de Corvera nació nel añu 1992 con un presupuestu de 200.000 pesetes, y adulces foi a convertíse nuna de les más importantes cites musicales del branu asturianu. Decenes de miles de persones d'Asturies averábense hasta Corvera la nueche de San Xuan pa participar d'un acontecimientu que yera muncho más qu'un conciertu, con un programa d'actividaes que duraba tol día y nel que rescamplaben les divulgatives y artístiques, y porque non dicilo, tamién les asturianistes y reivindicatives, casu de los "concursos de glayíos de protesta" o les "fogueres artístiques".

Con un presupuestu de 35.000 euros l'añu pasáu, la foguera foi a quien a xuntar nel conceyu a más de 30.000 persones según la policía local, un volume de públicu comparable al d'un macroconciertu con un gastu muncho más pequeñu. La fidelidá del públicu de la foguera, qu'aguantaba hasta última hora anque lloviere como pasó l'añu pasáu, llevó . a minchos medios de comunicación de fuera y dientro del Estáu español a facer referencia a esta nueche como una cita qu'encamentaben a los sos llectores, esublizando diarios de la tirada de "El País" o el "ABC" anuncies d'esti conciertu, una publicidá impagable pa un Conceyu como'l corveranu.

Con too y con ello'l Conceyu de Corvera, baxo la iniciativa d'USPC (Unión Social Progresista
de Corvera) sociu de gobiernu del PP, decidió treslladar esti conciertu de llugar y d'ideoloxía, llevándolu a Les Vegues y convirtiéndolu nuna romería con orquestes gallegues, escaeciendo cualesquier conteníu alternativu. Dende'l Conceyu ta claro que nun emponderen l'ésitu que tenía la nueche de San Xuan, y decidieron nun facela cenciellamente pol conteníu de munches de les actividaes de la nueche.


Agora namás queda por ver si la iniciativa popular va ser quien a entamar una nueche alternativa pal añu qu'entra, bona parte de la ciudadanía corverana ta por ello, yá que lo más seguro que ye pal añu que vien dexe d'haber nueche folk en Corvera, y se convierta nuna romería más.