La Fiscalía va investigar les causes de la negación del tratamientu pa ser madre a una vocal de Xega

La Fiscalía Superior del Principáu d’Asturies abrió dilixencies d’investigación sobre’l casu d’una de les muyeres que vieron como se-yos negaba el tratamientu pa ser madre por ser lesbianes. El casu concretu ye’l de Silvia García, vocal de Xega.
 
Según esplicó García nuna rueda de prensa tres dar conocer la situación a la opinión pública, la unidá de reproducción asistida del Hospital Universitariu Central d’Asturies (HUCA) negó-y l’accesu al tratamientu de reproducción asistida por esistir una “orde verbal” de responsables de l’Alministración sanitaria. En concreto, foi’l 18 d’abril pasáu cuando acudió al HUCA por tener cita na Unidá de Reproducción Asistida tres realizar toles pruebes médiques necesaries. Una una vez allí, el xefe del Serviciu treslladó-y de manera verbal la “orde” recibida de la Conseyería de Salú y Servicios Sanitarios “de nun volver a almitir a nenguna lesbiana, nin a muyeres soles”. Según informó esta persona a la vocal del área de lesbianas del coleutivu, Amalio Alonso y Joaquín Arcadio Martínez foron quienes-y dieron esta instrucción.
 
Ésti nun yera’l primer casu que se daba n’Asturies, porque a primeros d’abril otra muyer lesbiana sufrió la mesma discriminación, nesta ocasión en Mieres. Según informa l’escritu del Ministeriu Públicu, al que tuvo accesu Europa Press, namái inclúi –pel momentu– la investigación de la discriminación que sufrió García.