La Fiscalía va investigar l’aumentu d’emisiones pol prendíu del fornu altu B d’Arcelor-Mittal en Xixón

La nube tóxica provocada pol prendíu del fornu altu B de la factoría de Xixón d’Arcelor-Mittal llevó a la Coordinadora Ecoloxista d’Asturies a denunciar un aumentu d’emisiones por parte de la empresa. La Fiscalía va investigar esta situación.

“Les emisiones y inmisiones son de continuu monitorizaes polos sistemes operativos pertenecientes a l’Alministración pública, tanto pol Principáu como pol Ayuntamientu, al traviés de  les estaciones de control, que marcaron l’aumentu de contaminación atmosférica por partícules de forma mui significativa esi día tal como se reueye na web del Principáu en ‘Rede de Control de la Calidá d’Aire d’Asturies’, yá que la media diaria de la estación d’Arxentina ye’l triple del valor habitual d’otros díes”, argumenten los ecoloxistes. Otru fechu que consideren revelador ye cómo afeutaron estes partícules de metal a los coches estacionaos na vía pública en llugares cercanos a la factoría de la empresa anglo-india en Xixón, como Tremañes, Porceyo, La Calzada, Perchera o La Braña. Asina, más de 150 persones denunciaron a la Policía cómo la contaminación corroyó la chapa de los sos vehículos na madrugada del 17 de xineru, momentu nel que se prendió’l fornu altu.

Dende la Coordinadora apunten que si los automóviles se vieron dañaos poles partícules, éstes “posiblemente afeutaren a la salú de les persones, yá que les más fines  pueden ser inspiraes y penetrar nel sistema respiratoriu, pero tamién al traviés de la inxesta de productos procedentes de la ganadería y cultivos de la zona, o de l’afeutación que pudiera tener sobre’l nivel freáticu y la consiguiente contaminación hídrica”. Esta situación lleva a esta organización a acusar a Arcelor-Mittal culpable d’un delitu tipificáu nel artículu 325 del Código Penal, dalgo qu’agora va investigar la Fiscalía.