La Fiscalía pide cuatro años de cárcel pa una persona acusada de llanzar voladores a la Guardia Civil

Un vecín d’Ayer acusáu de llanzar voladores a la Guardia Civil podría enfrentase a cuatro años de cárcel. Ésa ye la pena que pide la Fiscalía a una persona detenida’l 12 de xunu na A-66 a l’altura de Vega’l Rei (Ḷḷena) mentes la fuelga de la minería.

J.C.G.G., nacíu nel 1964, ta acusáu de llanzar voladores contra la Guardia Civil sirviéndose de tubos metálicos que facíen de llanzadera, asina como oxetos d’aceru con gomeru mientres una de les protestas celebres cuando la fuelga de la minería. Atribuyen-y un delitu d’atentáu a axente de l’autoridá cola agravante de disfraz, según señaló’l Fiscal Superior de Asturias, Gerardo Herrero, que tamién informó qu’ésti ye’l primer escritu d’acusación presentáu énte’l Xulgáu pola Fiscalía tres les detenciones derivaes de les protestes mineres.

Dichu escritu sostién que, sobre les once de la mañana del día 12 de xunu, unes 300 ó 400 persones llevantaren una barricada compuesta por neumáticos ardiendo que cortaba l’A-66 a l’altura de Vega’l Rei. Señala amás qu’ente estes persones había un grupu más pequeñu, al que supuestamente permanecía l’acusáu, que llanzaba voladores contra los antidisturbios de la Guardia Civil que vixilaben la concentración usando tubos metálicos y tornillos y tuerques de grandes dimensiones. Dellos axentes persiguieron a estes persones, alcanzando namái a J.C.G.G., que resultó deteníu.