La financiación de l'ALLA nos PXE, 'Meyor noticia pal asturianu en 2020'

|
Aprobación PXE 2020 nel Congresu

Los participantes na votación popular entamada por Iniciativa pol Asturianu valoraron la importancia d'esti fechu qu'iguala a la institución asturiana al restu d'academies.

'Inclúise per primer vegada una partida pa l’Academia de la Llingua Asturiana nos Presupuestos Xenerales del Estáu' foi la 'Meyor noticia pal asturianu en 2020' ente les 25 propuestes d'esta encuesta llanzada n'Internet per sétimu añu siguíu. Foi en payares cuando se conoció y s'aprobó la enmienda del PSOE y de Xuníes Podemos a les sos propies cuentes pa que l'Academia de la Llingua Asturiana (ALLA) recibiera 40.000 euros del Estáu, dalgo históricu anque entovía lloñe de lo que reciben la Real Academia Galega y l’Institut d’Estudis Catalans (311.380 euros), Euskaltzaindia (220.000) y, con más diferencia, la Real Academia Española destínense (6.827.420 euros), ensin escaecer los 83.650 euros pa la Comisión Permanente de la Asociación de Academias de la Lengua Española.

La segunda noticia más votada foi 'Barbón conviértese nel primer presidente qu’usa l’asturianu de forma consciente nuna rueda de prensa', precisamente a una entruga d'Asturies.com, siguida del 'Usu del asturianu con normalidá nes campañes del andanciu y de salú del Gobiernu d'Asturies'. Los participantes nesta votación d'Iniciativa pol Asturianu tamién valoraron la presencia cada vegada mayor del idioma en proyeutos empresariales, como la compañía de telefonía móvil Nordés, Acuto Xuegos o Danone.

Asina trató Asturies.com la 'Meyor noticia pal asturianu en 2020':

 

Contador Estadistiques