La fin de selmana cabera d'agostu llega cargada d'actividaes

|
La fin de selmana cabera d'agostu llega cargada d'actividaes

Agostu, el mes vacacional por escelencia, afronta la so fin de selmana cabera. Como nun podía ser d'otra forma, hai munches actividaes ente les qu'escoyer, destacando sobre manera'l Certame del Quesu Cabrales, la Noite Celta de Porcía y les fiestes d'El Pote.

Arenas va acoyer el domingu'l XLVI Certame del Quesu Cabrales, nel que la mayoría de los 30 productores de quesu Cabrales con Denominación d'Orixe Protexida (DOP) acuden colos sos meyores ellaboraciones col oxetivu de llevar el 'Meyor Quesu del Concursu'. Tamién son munchos los visitantes que visiten el conceyu del oriente asturianu nesta xornada pa facese con esti productu, consideráu ún de los meyores quesos del mundu.

Noite Celta de Porcía

Mañana, na alameda de Porcía, va celebrase la XXX Noite Celta de Porcía, la decana de les que se faen n'Asturies. La Banda Gaites LaKadarma encargaráse d'abrir les actuaciones pa depués dar pasu a la banda de la zona Caldo y Os Rabizos y a Felpeyu, qu'esti añu cumple un cuartu de sieglu de vida. El toque internacional va ponelo la banda astur-escocesa Fraser Fifield Quartet, mentes que Spanta la Xente va zarrar la nueche.

El Pote

Una de les fiestes más multitudinaries de la cuenca'l Nalón ye El Pote, que va allargase dende güei hasta'l llunes, pa continuar el vienres 2 y el domingu 3. Asina, en Santa Bárbola va poder disfrutase de munches actividaes entes les que destaquen les verbenes con Assia y Dominó (güei); Los Players y Super Hollywood (mañana), Kosmos y el Mariachi Estampas (domingu, día grande de les fiestes); y Royal y La Fórmula (llunes).

IV Festival Unirock

En Veiga va celebrase mañana una edición nueva del Unirock, festival que va tener como bandes principales a los asturianos Mala Reputación y a los madrilanos Hamlet, formación clásica del metal estatal. Completen el cartelu la banda del País Valencià, Killus, y los gallegos Remakers.

Les actuaciones van principiar a les 22 hores, con entrada llibre, anque habrá actividaes en Veiga dende la mañana. Otra manera, la organización ufre acampada, pa lo que ye necesario acutar plaza.

Contador Estadistiques