La filial castellana de Telecable tien cansos a los abonaos

Los usuarios de Retecal, la operadora de cable de Castiella-Llión que, lo mesmo que Telecable, pertenez tamién a la Hidroeléctrica del Cantábrico, tan acusando dende primeros d'añi, problemes bien gordos col serviciu d'internet de banda ancha qu'ufre la compañía. Los internautes del otru llau del cordal tienen problemes de perda de velocidá de la llinia, cortes del serviciu, y cayida de servidores de corréu y de news. Too ello ensin que la compañía dea esplicaciones, dicen los afectaos. énte esta siuación, un grupu curiosu d'usuarios de Retecal decidieron montar una plataforma de protesta que, a lo llargo d'esta selmana ta desarrollando bien d'actividaes contra la operadora, qu'inclúin llamaes masives al númberu d'atención al cliente, unvios de correos electrónicos a los responsables de la compañía y un comunicáu cola firma de más de 500 clientes (domésticos y d'empreses) pidiendo que Retecal igüe'l serviciu y nel que diz que piensen pidir indemnizaciones.D'últimos del añu 2002 p'acá, bien d'usuarios de Telecable vienen tamién notando baxades de velocidá nel serviciu de conexón a la rede de banda ancha qu'apurre la compañía asturiana. Telecable, qu'entró l'añu con más de 50.000 abonaos tres d'un exerciciu 2.002 en que ganó bien de clientes, ta afitándose como operador de referencia nes ciudaes onde da serviciu, pero anque anunció meyores na rede de freba óptico p'atender la mayor demanda y dar más velocidá, de momentu parez que ta teniendo "problemes técnicos" como llegaron a comentar a Asturies.com dende'l serviciu d'atención de la compañía.