La Fiesta de la Sidra Natural de Xixón llega al so tramu final

|
Ún de Grao na XXVII Fiesta de la Sidra Natural

Esta fin de selmana concéntrense los eventos más destacaos del certame, ente ellos l'intentu de récor d'escanciáu simultaneu.

La convocatoria ye a les 20.30 hores na sablera d'El Natahoyo y l'oxetivu, superar los 9.403 echadores del añu pasáu. Tolos asistentes van recibir una botella de sidra de baldre, anque han de trayer el vasu de casa o mercar l'oficial por 1 euru, cola posibilidá tamién d'acudir con una botella si nun quier esperar a la posible filera que se forme dende que comience'l repartu de les 9.404 que pon la organización dende les 18 hores.

L'intentu del récor abre los últimos díes del XXVII Festival de la Sidra Natural, que comenzó'l sábadu cola apertura del Mercadín de la Sidra y la Mazana que s'asitia nos Xardinos de la Reina y que va permanecer hasta'l domingu a les 22 hores, cuando'l certame eche'l pieslle.

Culinos y cantares de chigre

Los 'Cancios de chigre', mañana a les 21 hores, ye otru de los momentos con más puxu ente la xente. Nesta cita, el públicu canta na Plaza Mayor en comuña cola Sociedá Torner cantares tradicionales.

El domingu, día grande, va tener l'eventu central de la Fiesta de la Sidra Natural dende'l meudía. Rosabel Berrocal, organizadora del eventu nos venti años últimos, va recibir el Tónel d'Oru, y va comenzar la preba de baldre de sidra hasta les 15 hores, cuando va interpretase l'himnu del país.

Pentemedies, va fallase y entregase les condecoraciones a los llagares ganadores d'esta edición, tanto del xuráu como del públicu.

Concursu d'Escanciadores

Ayeri celebróse'l XXV Concursu d'Escanciadores, puntuable pal Campeonatu d'Asturies. L'ecuatorianu Jorge Vargas, de les sidreríes El Mallu, foi'l campeón absolutu, mentes que na categoría llocal el primer premiu llevólu Pelayo Rodríguez, d'El Rincón de Celia.

Na semeya, una danza mientres el 'Conciertu de la Sidra' que protagonizó'l miércoles Ún de Grao.

Contador Estadistiques