La fiesta de la sidra de Xixón entama con normalidá tres el discutiniu

Mañana xueves va inaugurase oficialmente la XXII Fiesta de la Sidra Natural de Xixón, que güei abre yá'l mercadín de la sidra y la mazana. Los llagareros llegaron a un alcuerdu col Conceyu y finalmente nun va haber boicó.

La XXII Fiesta de la Sidra Natural de Xixón va entamar de forma oficial mañana a les 12 hores, cola apertura del Chigre del barriu de la Sidra, y va allongase hasta'l domingu. Finalmente, paez que tou va trescurrir con normalidá y los 22 llagares previstos van tar presentes, tres la xunta d'esta mañana ente llagareros y l'equipu de gobiernu del Conceyu. El malestar causáu pola nueva llexislación “antibotellón” provocó que llagares como Menéndez y Buznego alviertiesen que nun diben tar nel festival de siguir la persecución policial a la sidra en Cimavilla. L'esplegue policial nel barriu xixonés el pasáu fin de selmana torgó a los veceros de los establecimientos echar sidra fora de les zones delimitadas como terraza, una actuación que dende'l sector hosteleru y l'Asociación de Llagareros consideróse desproporcionada y pola  que se pidió a Foru un control menos fuerte, señalando que “falar de sidra nun ye lo mesmo que falar de botellón”.

Tres l'alcuentru d'esta mañana, el conceyal de seguridá ciudadana, Rafael Felgueroso, aseguró que'l consumu de sidra va poder siguir realizándose como yera habitual na zona de Cimavilla y los llagareros dan per atayáu l'alderique, calificando l'incidente como “dañu colateral”. Los asistentes van poder tastiar el productu de los 22 llagares convidaos nel chigre que se va instalar na redoma de la Playa de Poniente, a partir de mañana. La Fiesta de la Sidra va allongar hasta'l domingu 1 de setiembre y amás de la ufierta sidrera y gastronómica va acoyer actividaes como'l concursu d'escanciadores y el récord d'escanciáu simultaneo, el vienres 30, o los cantares de chigre na Plaza Mayor, el domingu a les 21 hores. El festival va cerrar cola entrega del Premiu del Públicu y l'Elogio d'Oru a la meyor sidra de la fiesta.