La fiesta cultural antitaurina del 1914

Les protestes de los años últimos contra la Feria de Begoña nun son una novedá. Yá hebo oposición dende la construcción de la plaza nel 1888 como atractivu turísticu.

El 15 d'agostu del 1914 la Sociedad Antiflamenquista Cultural y Protectora de Animales y Plantas entamó una xira n'El Coto pa protestar contra los toros n'El Bibio, axuntando a más de 4.000 persones. La construcción del 'coso' en Xixón fíxose p'atrayer turistes a la villa, con oposición d'una gran parte de la población, como queda constancia nesta manifestación calificada como "fiesta cultural antitaurina" nuna población de 50.000 habitantes.

Gaspar Melchor de Xovellanos yá destacaba en 'Memoria para el arreglo de la policía de los espectáculos y diversiones públicas, y sobre su origen en España' cómo estos festexos nun teníen raigañu en tolos puntos del Estáu y cómo nun suponía una diversión pa gran parte de la ciudadanía. Nos años últimos, cola esceción d'ésti pola pandemia de COVID-19, venía celebrándose una protesta peles cais de Xixón y frente a la plaza en contra de les corríes de toros, axuntando a un importante númberu de persones.