“La ficción asturiana y n’asturianu ye l’asignatura pendiente del sector audiovisual”, asegura Adolfo Camilo Díaz

‘Muyeres inesperaes’ podría convertise nel primer productu de ficción fechu n’Asturies pa la TPA. La productora López-Dalton acabó de grabar na madrugada d'esti xueves el programa pilotu d’esta serie en llingua asturiana baxo la direición d’Adolfo Camilo Díaz.

Un equipu conformáu por 15 persones tuvo estos díes trabayando nel salón d’actos del Centru Cultural de Tresona na grabación del programa pilotu de ‘Muyeres inesperaes’, productu pensáu pa televisión basada na obra de teatru d’Adolfo Camilo Díaz, qu’exerce tamién de direutor. Nos díes próximos va comenzar el llabor d’edición, cola intención d’entregalu a la TPA pa la so valoración a últimos d’agostu y la so posible emisión en setiembre.

Nel casu d’algamar el preste de la direición del ente públicu de comunicación y del públicu, procederíase a grabar más capítulos, que podríen dir dende les 4 situaciones que conformen la obra teatral a 7, o inclusive más, si s’entemecen histories. “La intención ye ufiertar un productu dignu, de calidá, que se pueda emitir na TPA y inclusive doblar pa otres televisiones. Y creo que lo va ser”, afirma’l creador teatral.

‘Terapia’

La situación ‘Terapia’ d’esta obra estrenada l’añu pasáu, “que ta funcionando mui bien” nos escenarios asturianos, ye la que protagoniza’l programa pilotu. Nella trés muyeres, una d’elles dominicana, coinciden nuna clínica psicolóxica tres sol golpiaes pola vida.

Isabel Friera, Elisabet Martín y María López Barrio, actrices que formen parte del repartu de la versión pal teatru, repiten frente a les cámares nesti episodiu d’unos 25 minutos de llargor. Sheila Montes, Beatriz Canteli y Nieves Fernández completen l’elencu d’actrices de ‘Muyeres inesperaes’, una obra de marcáu calter femenín y feminista con situaciones de comedia con ciertu toque dramáticu.

“La ficción asturiana y n’asturianu ye l'asignatura pendiente n'Asturies del sector audiovisual y eso ye dalgo que toos sabemos, tamién los responsables de la TPA. Ye un mediu pa xustificar la esistencia propia del ente y ye clave pa dar vida al sector audiovisual y teatral asturianu, amás de pa poder retener el talentu n’Asturies”, asegura Díaz. Too ello ensin escaecer “la importancia que tendría pa la normalización llingüística del asturianu”.