La Feria LlibrUviéu va acoyer la presentación de la obra ganadora del Máximo Fuertes Acevedo

‘El síndrome de Sherezade’, de Vicente García Oliva, va presentase esti vienres nel marcu de la Feria LlibrUviéu, que pieslla esti domingu. Esta obra ganó’l XVI Premiu Máximo Fuertes Acevedo d’ensayu n’asturianu.
 
Vicente García Oliva llevóse la edición del 2010 d’esti premiu prestixosu d’ensayu con ‘El Síndrome de Sherezade’, obra na que l’escritor xixonés, con bon estilu narrativu, analiza la necesidá antropolóxica de cuntar hestories y les funciones de los mitos y cuentos populares, con una consideranza especial de la sociedá actual y de la cosmovisión asturiana. La Conseyería de Cultura y Turismu y Ediciones Trabe espublicen agora esti trabayu, premiáu con 7.000 euros, que se presenta a les 19 hores del vienres na carpa asitiada nel paséu Los Álamos, cola presencia del autor y del profesor de la Universidá d’Uviéu, Roberto González-Quevedo González.
 
Esta presentación nun va ser la única de la xornada de la Feria LlibrUviéu, que vien celebrándose dende’l vienres pasáu y que va zarrar les sos puertes el domingu. A les 18 hores, Saúl Fernández va dar a conocer la so obra ‘En medio del invierno’; y a les 20 hores, Maxim Huerta va facer lo propio con ‘El susurro de la caracola’. Hai que destacar que LlibrUviéu celebra esti vienres el Día de la Fundación ONCE.