La Feria del Llibru y del Discu n’Asturianu echa a andar n'Avilés con 1.000 títulos a la venta

Esti xueves inauguróse na Pescadería Municipal Antigua d’Avilés la Feria del Llibru y del Discu n’Asturianu. Hasta’l domingu, los visitantes van poder acceder a 1.000 títulos y, con cada merca, recibirán un exemplar de ‘El ríu y la memoria’.

Lliteratura infantil, poesía, narrativa o ensayu, y discos de folk, rock o tonada, toos en llingua asturiana, tán a disposición de les persones que s’averen a la Pescadería Municipal Antigua d’Avilés ente güei y el domingu. Esti recintu, que coneuta al traviés d’una pasarela col Centru Niemeyer, acueye estos díes la Feria del Llibru y del Discu n’Asturianu, iniciativa de la Conseyería d’Educación, Cultura y Deporte, en collaboración col Conceyu d’Avilés, qu’organiza l’Asociación de Llibreríes del Principáu d’Asturies baxo’l mesmu modelu que ‘LibrOviedo’, esto ye, con caxa única. Según esplica’l so presidente, Luis Martín Muñiz, “en llugar de que cada llibreru ponga’l so stand, caún d’ellos pide unos llibros determinaos a les editoriales, creándose una llibrería única. Asina, tolos llibreros trabayen pa la Feria, con una caxa y gastos únicos, al igual que los ingresos, nel casu de qu’haya”. Esti formatu permite que, baxo la xestión de l’asociación y les llibreríes llocales Casona, Balmes y Noveno Arte, “tengamos alredor de 1.000 títulos a la venta”, de los que “el 60 por cientu son llibros y el 40, discos”, toos ellos con un descuentu del 10 por cientu respeuto al so preciu orixinal.

Les persones que se pasen estos díes pol llugar y merquen dalgún productu recibirán, de baldre, un exemplar de ‘El ríu y la memoria’, antoloxía poética de Nené Losada Rico de la que ye responsable Taresa Lorences. Precisamente, la presentación d’esti llibru conmemorativu de la XXXIV Selmana de les Lletres Asturianes protagonizó la inauguración oficial de la Feria del Discu y Llibru n’Asturianu, actu nel que tuvo presente’l viceconseyeru de Cultura y Deporte, Alejandro Calvo; la direutora xeneral de Política Llingüística, Ana Fueyo; el conceyal de Cultura, Román Antonio Álvarez González; la escritora Lorences; y Martín Muñiz.

Calvo, qu’utilizó’l castellanu na mayor parte de la so intervención, resaltó la intención de la conseyería de “abordar tolos ámbitos de la creación” en llingua asturiana nesta edición de la Selmana de les Lletres, enfotándose tamién na edición, “un sector mui importante que foi creciendo al traviés de los autores y los bonos trabayos editoriales que se desendolcaron, pero que tamién necesita un apoyu y una visibilidá que queríamos mostrar nestos momentos”. Darréu, dio la pallabra a Martín Muñiz, qu’agradeció a Cultura la decisión de convidar al so coleutivu a poner en marcha una iniciativa “que llevábamos unos años reclamando” y naguó por que la Feria “sía la semiente” d’un certame que duré nel tiempo.

Pela so parte, Fueyo emponderó’l recintu qu’acueye la Feria del Llibru y Discu n’Asturianu y fixo referencia “a les munches ganes y ilusión” que punxo la conseyería nesti eventu, al que deseó continuidá. Tamién amosó la so satisfaición pola celebración d’esti certame l’edil de Cultura, qu’afirmó que “una llingua y una cultura necesiten el soporte escritu pa consolidase. Ye perimportante que la lliteratura –tamién el discu, que vien a ser una forma de lliteratura– tenga un soporte estable pa que la xente la consuma y pueda circular”. D’igual forma, Álvarez González anunció la disposición del Conceyu d’Avilés de “siguir acoyendo la Feria n’años posteriores pa que se pueda consolidar”.

Llibru de poemes de la segunda etapa de Nené Losada

Lorences encargóse de falar de “la poeta de Valdés”, esponiendo trés motivos que permiten a la obra poética de Nené Losada Rico figuarar “con pleno derechu na historia de la lliteratura asturiana”. Asina, la primera ye que “consiguió aquello a lo que toda creación artística aspira: conmover y emocionar”, pa, en segundu llugar, destacar que la valdesana tresmite esta obra “na fala viva de Valdés”. Amás, la escritora de Salas resalta que Losada “foi quien a evolucionar de la poesía de corte más popular y tradicional, a les nueves corrientes qu’apaecen n’Asturies nos años 80, sumándose a los autores que, a partir de lo que se conoz como Surdimientu, dan un pasu alantre y promueven les lletres asturianes”. Tamién citó cuando conoció a la valdesana, “nel 1984, cuando la Sociedá Cultural La Regalina de Cadavéu concedióme’l Premiu Fernán Coronas na so primer edición”, recordando “la so estatura física, moral, intelectual, espiritual…, inclinándose sobre la mesa pa que-y firmara un exemplar; la so sonrisa cálida; siempre atenta, mui atenta, a lo que facíamos los demás autores”.

No que respeuta a ‘El ríu y la memoria”, destacó que se trata d’una esbilla “de poemes breves y aparentemente cenciellos” de la segunda etapa de Losada, esto ye, los qu’escribió “na década de los 90 y a partir del 2000”. Zarró l’actu Calvo, con una llectura d’un testu en llingua asturiana, nel qu’apuntó “que la lliteratura y la música son dos campos onde la presencia del asturianu ye abondo valoratible, non sólo pola bona cantidá de creadores que lu utilicen como idioma, como vehículu d’espresión artística, sinón tamién pola calidá de los sos trabayos, que los fixo ganar el reconocimientu del públicu y de la crítica”. Nesi sen, señaló que la Feria del Llibru y Discu n’Asturianu “ye un reconocimientu más al trabayu de los creadores al establecer un mecanismu nuevu que facilite aqueḷḷo a lo qu’aspiren toos ellos: la ḷḷegada de la so obra al públicu; pero amás que la Feria sía un escaparate inmeyorable pa que la Selmana de les Lletres faiga evidente la bayura de la producción artística en ḷḷingua asturiana”, ensin escaecer a los llibreros y comerciantes. Por último, deseó que’esti certame “sía un ésitu ya se convierta na primera d’una serie que dure bien d’años”.

La Feria del Llibru y Discu n’Asturianu va ta abierta al públicu n’horariu de 11 a 14 hores, y de 17 a 21 hores, hasta’l sábadu, mentes que’l domingu va tar de continuu de 11 a 19 hores. Nestos díes hai programaes delles presentaciones de llibros y actividaes nel recintu. Les persones interesaes pueden siguir tola actividá del certame al traviés de la cuenta en Twitter de l'Asociación de Llibreríes del Principáu d'Asturies.