La Feria del Llibru Infantil y Xuvenil de Xixón entama delles actividaes n’asturianu

Un cuentacuentos, una esposición y la presentación d’un llibru conformen la programación n’asturianu de la IV Feria del Llibru Infantil y Xuvenil que se celebra en Xixón del vienres al domingu. El Centru Municipal Integráu Pumarín-Xixón Sur va acoyer toles actividaes.

El sábadu, a les 12.30 hores, va celebrase la primer d’elles. Trátase de la presentación del cuentu ‘Don Quixote y la Princesa del Arbeyu’ (Impronta), obra de Carlos González Espina y Alicia Varela, que va tener llugar na sala d’esposiciones. Olga Cuervo, mentes, va protagonizar el domingu, a les 11.30 hores noe aules 6-7 el cuentacuentos ‘Aquel viaxe estraordinariu (camudó al home solitariu)’, un homenaxe a George, Ringo, Paul y John, esto ye l’históricu grupu de música inglés The Beatles.

El cuentu básase nel testu de Lucía Tejerina, editáu por Impronta y la Oficina Municipal de la Llingua, que cuenta coles ilustraciones de María Díaz Perera. Los participantes nesta sesión van poder disfrutar al empar d’una esposición coles imáxenes del llibru.

Toles actividaes de la Feria del Llibru Infantil y Xuvenil son de baldre, hasta completar aforu. Calcando equí pue consultar el programa completu.