La Farrapona y L’Angliru regalen dos tardes espectaculares a los aficionaos nes que Cobo garra’l llideratu

El ciclista de Cabezón de la Sal, Juan José Cobo, arrampuñó’l maillot colloráu de llíder de La Vuelta en L’Angliru al británicu Bradley Wiggins nuna ascensión espectacular. L’altu riosanu y La Farrapona nun defraudaron a l’afición.
 
Wiggins (Sky), especialista na llucha contra’l reló, llegó a Asturies como llíder y consiguió aguantalo’l sábadu nuna etapa na que s’estrenaba La Farrapona, xubida llarga y dura asitiada en Somiedu qu’axuntó a miles d’aficionaos. L’estoniu Rein Taaramäe (Cofidis) consiguió llevase’l trunfu con 25 segundos de ventaxa sobre Cobo (Geox-TMC), qué yá daba muestres del bon estáu de forma que mantién. Sicasí, Wiggins conseguía mantener el maillot colloráu de llíder por 7 segundos sobre’l so compatriota y compañeru d’equipu Christopher Froome.
 
Les diferencies curties que dexó La Farrapona na xeneral prometía un espectáculu incomparable nes cuestes de L’Angliru, que dende primera hora taba hasta arriba d’aficionaos al ciclismu procedentes de toles partes de mundu: la organización llegó a falar de 100.000 persones nel puertu. Hasta l’octavu clasificáu, toos teníen opciones reales de ponese llíder, con Cobo asitiáu na cuarta plaza a 55 segundos de Wiggins. Tres pasar pel Tenebréu y el Cordal, el pelotón llegó a Riosa pa enfilar la xuba a l’infiernu y les sos rampes del 23 por cientu nel que ‘El Bisonte de La Pesa’ dexó a los sos competidores clavaos tres dos intentones de Carlos Sastre (Geox-TMC) y del xixonés Carlos Barredo (Rabobank), ataque que nun pudo cristalizar pese a los gritos d’ánimu de l’afición asturiana.
 
Asina, l’ataque bonu foi’l d’Igor Antón (Euskaltel-Euskadi) y el de Cobo, anque’l corredor de Galdakao nun pudo aguantar el ritmu del cántabru, que pedaleo los quilómetros últimos del puertu en solitariu. Na meta, ‘El Bisonte de La Pesa’, de 30 años, que tuvo a punto de retirase esti añu del ciclismu, algamó’l mayor ésitu de la so carrera al ganar en L’Angliru y facese col maillot de llíder de La Vuelta con 20 segundos sobre Froome. Wiggins ye agora terceru a 46 segundos.
 
Moto recalentada
 
Como anéudota d’esta quinta xubida de La Vuelta a L’Angliru ta l’incidente de la moto de TVE na Cueña les Cabres, con rampes de más del 23 por cientu. El vehículu que seguía al grupu del llíder recalentó y nun pudo superar esa zona del puertu, cayendo al suelu’l motorista y el cámara. Los aficionaos corrieron a ayudalos, pero la moto nun pudo siguir en carrera y la cadena pública, qu’unvía les imáxenes de la ronda a toles televisiones del mundu, namái pudo emitir l’ascensión de Cobo pola imposibilidá de grabar dende l’helicópteru pola borrina.
 
Otra manera, La Vuelta vive güei una xornada de descansu. Mañana va disputase la decimosesta etapa, con salida en Villa Romana La Olmeda (Palencia) y llegada n’Haro.