“La falta d’oficialidá nun ye un argumentu válidu pa torgar la continuidá del plan pa facer l'asturianu vehicular en Primaria”, afirma Iniciativa

|
CP El Bosquín

“Nun se puede esconder la poca ambición na política llingüística y educativa na ausencia del estatus d’oficialidá del asturianu y del eonaviegu”, llamenta Iniciativa pol Asturianu llueu de conocer la negativa de la Conseyería d’Educación a dar continuidá al Plan Pilotu esperimental de Promoción del Usu del Asturianu. Per dos cursos púnxose en marcha en seis centros, con bonos resultaos.

“Xurídicamente nun se pue dir más allá al nun l’asturianu llingua cooficial. Ésa ye la clave”, argumentó Lydia Espina pa xustificar el posicionamientu de la conseyería. “Yera una actuación de calter esperimental, con limitaciones xurídica y organizatives, que tenía un principiu y un final”, añadió’l xueves na Comisión d’Educación énte una entruga al respeuto de Foro, que pidía la so recuperación y ampliación a institutos.

Iniciativa pol Asturianu llamenta esta falta de voluntá por recuperar esti plan “a costu cero pa la normalización y la presencia digna del idioma en diferentes escueles” y recuerda que la puesta en marcha d'esi plan “nun requixo más recursos educativos y económicos pa la so realización”. Rescampla que, alcordies colos datos del informe posterior fechu pol Gobiernu, “el 83,6% de les families que participaron nel plan nel cursu 2017-2018 recomendaríen la participación nel programa. D'igual manera, un 41,59% de los estudiantes meyoraron los resultaos na asignatura cursada n'asturianu y el y un 42,57% caltuvo les calificaciones”.

Tamién apunta que nesi momentu’l PP interpunxo una demanda “que foi desestimada pola xusticia. Poro, la falta del reconocimientu d’oficialidá nun ye un argumentu válidu pa torgar la continuidá d’esta esperiencia educativa onde l’asturianu yera vehicular y de manera voluntaria”. “Nun se puede esconder la poca ambición na política llingüística y educativa na ausencia del estatus d’oficialidá del asturianu y del eonaviegu”, conclúi esta organización, qu’en febreru yá reclamara nun conceyu a Educación la recuperación del plan.

Na semeya, CP El Bosquín, asitiáu en L'Entregu, ún de los seis centros qu'acoyó'l plan pilotu nos cursos 2017-2018 y 2018-2019.

Contador Estadistiques