La falta de nieve impide l’apertura de les estaciones

La nieve cayida en payares nun foi suficiente p’abrir les estaciones d’esquí, una situación que se vien repitiendo nos años últimos. Esti xueves yera’l día marcáu pol Gobiernu p’abrir la temporada en Valgrande-Payares y Fuentes de Invierno.

El curtiu espesor de nieve acumuláu, malpenes 40 centímetros ensin pisar, nun permite la práutica del esquí, polo que los aficionaos a esti deporte nel país habrán d’esperar la llegada d’un frente nuevu que permita una acumulación suficiente. Les previsiones meteorolóxiques nun son esperanzadores nesi sen nos diez díes próximos, polo que la selmana qu’entra, con dos díes festivos, nun habrá esquiadores nes dos estaciones asturianes.

Esti añu la nieve llegó mucho enantes que nel anterior, pero nun ye suficiente pa l’apertura de estaciones nel primer día de la temporada, siguiendo la tónica de los tiempos últimos. Asina, l'iviernu pasáu les pistes nun s'abrieron hasta mediaos de xineru y, tres un zarru temporal por condiciones adverses, l'actividá normal nun se recuperó hasta un mes depués.

Los deportes de nieve son una de les grandes apuestes del Gobiernu, como amuesa’l fechu de que reciba la mayor parte del presupuestu de Deportes. Pese a ello, esti añu zarró ún de les telesielles que xubi Cuitunigru alegando razones de seguridá pese a les protestes d'usuarios y hosteleros de la zona.