La facultá de Filoloxía celebra la so selmana de les lletres

Dende güei martes y hasta'l próximu xueves, los alumnos de l'asignatura d'asturianu de la facultá de filoloxía presenten la I Selmana Universitaria de les Lletres asturianes. L'oxetivu d'esta convocatoria ye'l de presentar les voces más moces que tan xurdiendo na nuesa llingua y que tienen un futuru casi qu' aseguráu.

Escritores yá asitiaos nel panorama lliterariu asturianu como Xuan Bello o Adolfo Camilo Díaz van ser los encargaos de presentar la obra de los escritores más mozos

Les xornaes entamaron esta mañana cola presentación de pablo Suárez a cargu d'Adolfo Camilo Díaz y siguen güei dende les 4 y media con una charra sobre la "música actual n'asturianu" a cargu del cantante de Dixebra, Xune Elipe. Darréu, Ramón Lluis Bande va falar sobre'l cine y la producción audiovisual n'asturianu, rematando la xornada con una proyección de curtios n'asturianu.

Mañana miércoles, Xosé Miguel Suárez presenta la obra de Pablo Texón a les 12 del mediudía, mientres qu' a les 4 de la tarde van siguir les proyecciones de curtios n'asturianu, con títulos como "Lluvina" "7337" o "L'aire les castañes". El xueves 6, José Luis Piquero presenta la obra d'Hector Blanco y Xuan Bello fai otru tantu cola d'Ana Vanessa Gutiérrez, poniendo'l piesllu a la selmana un recital colectivu de poesía a les 4 de la tarde. Tolos actos son nel Salón d'Actos de la Facultá de Filoloxía d'Uviéu