La evolución de la pandemia completa la curva epidemiolóxica

El fin de la curva de la pandemia de COVID-19 permite estudiar la evolución de la mesma. Asturies.com vieno espublizando gráfiques colos modelos d’andancios Verhulst y Gompertz a lo llargo del estáu d’alarma y si, nos primeros díes del mes d'abril, paecía siguir el primeru, finalmente axustóse al segundu.

Con un númberu mínimu o nulu de positivos por PCR nes selmanes últimes, a esceición del biltu nuna residencia de Xixón, confírmase el fin de la curva de la pandemia de COVID-19 n’Asturies. La serie entamó’l 29 de febreru, algamando’l so picu a lo último de marzu, momentu nel qu’empezó a baxar la curva.

Anque nun primer momentu, como apuntábamos nes informaciones espublizaes acompañaes con gráficos colos datos aportaos pola Conseyería de Salú de manera diaria axustaos por mínimos cuadraos, la evolución paecía siguir el modelu Verhulst, finalmente adaptóse al Gompertz. Echando una güeyada a la representación qu'acompaña esta noticia, con trés axustes en trés feches diferentes, compruébase que les trés curves Gompertz son consistentes col axuste final y práuticamente superpónense, mientres que les Verhulst tienen que variar de manera notable p'axustase a la evolución epidémica.

Datos del 2 d'abril

Datos del 7 d'abril

Datos del 27 d'abril contabilizándolos pola fecha de la toma de la muestra.